Surxondaryoda o‘rinbosaridan 2 million so‘m pora olgan maktab direktori 4 yilga qamaldi
U shtati qisqarayotgan o‘rinbosarini ish bilan ta’minlash evaziga pul talab qilgan.
Surxondaryo viloyati Termiz tumanida maktab direktori pora olganlikda aybdor deb topilib, 4 yilga ozodlikdan mahrum qilindi.
Sud hujjatlariga ko‘ra, 1987-yilda tug‘ilgan shaxs 2025-yil oktyabr oyidan boshlab tuman umumta’lim maktablaridan birida direktor lavozimida ishlab kelgan. 2025-yil dekabr oyida mazkur maktabda ma’naviy-ma’rifiy ishlar bo‘yicha direktor o‘rinbosari sifatida 0,5 stavkada ishlagan B.X. shtat qisqarishi sababli undan yordam so‘rab murojaat qilgan.
Aniqlanishicha, direktor mehnat qonunchiligiga zid ravishda, arizachiga ayol kishi bo‘lgani uchun maktab maslahatchisi lavozimiga ishga ololmasligini bildirgan hamda buning o‘rniga musiqa fanidan dars soatlari ajratish yoki psixolog lavozimiga joylashishni taklif qilgan.
Shu bilan birga, u maktab isitish tizimini yaxshilash uchun shaxsiy mablag‘ sarflayotganini aytib, ish bilan ta’minlash evaziga 2 million so‘mni “yordam puli” sifatida talab qilgan.
2026-yil 8-yanvar kuni direktor maktab yaqinida B.X.dan 1 million so‘m naqd pul va uning bank plastik kartasini olgan. Keyinchalik bankomat orqali kartadagi yana 1 million so‘m mablag‘ni naqdlashtirib olgan.
Ma’lum qilinishicha, oradan vaqt o‘tib, ish masalasi hal etilmagach, jabrlanuvchi pulni qaytarishni talab qilgan. Iqtisodiy jinoyatlarga qarshi kurash departamenti xodimlari tomonidan olib borilgan surishtiruv davomida direktor pullarni qaytarib bergan.
Jinoyat ishlari bo‘yicha Termiz tuman sudi tomonidan Y.D. Jinoyat kodeksining 210-moddasi (pora olish) bilan aybdor deb topildi. Sud hukmiga ko‘ra, unga 2 yil muddatga mansabdorlik lavozimlarida ishlash huquqidan mahrum etish hamda 4 yil muddatga ozodlikdan mahrum qilish jazosi tayinlandi.
