Livan va Isroil o‘rtasidagi sulh uch haftaga uzaytirildi

AQSh prezidenti Donald Tramp Livan va Isroil o‘rtasidagi o‘t ochishni to‘xtatish kelishuvi uch haftaga uzaytirilganini ma’lum qildi. Bu haqda Reuters xabar berdi.

 

Ma’lum qilinishicha, qaror Oq uyda o‘tkazilgan yuqori darajadagi muzokaralar yakunida qabul qilingan.

 

Uchrashuvda Isroilning AQShdagi elchisi Yechil Leyter hamda Livanning AQShdagi elchisi Nada Movad ishtirok etdi. Muzokaralar AQSh vositachiligida o‘tkazildi.

 

Trampga ko‘ra, kelishuv zo‘ravonlik darajasini kamaytirishga xizmat qilmoqda va tomonlar o‘rtasida ehtimoliy tinchlik bitimiga erishish imkoniyati mavjud. U yaqin vaqt ichida Isroil bosh vaziri Binyamin Netanyaxu va Livan prezidenti Jozef Aun bilan uchrashuv o‘tkazish rejalashtirilayotganini bildirdi.

 

AQSh tomoni Livanga Hezbullohga qarshi o‘zini himoya qilishda yordam berishini ma’lum qilgan. Mazkur guruh muzokaralarda ishtirok etmadi va o‘z harakatlarini “bosqinchi kuchlarga qarshilik” sifatida baholamoqda.

 

Avvalgi 10 kunlik sulh o‘tgan hafta tomonlar elchilari o‘rtasida erishilgan bo‘lib, dastlab yakshanba kuni yakunlanishi kutilayotgandi. Kelishuv zo‘ravonlikni kamaytirganiga qaramay, janubiy Livanda to‘qnashuvlar davom etmoqda. Isroil ushbu hududda “bufer zona” deb atayotgan hududni nazorat qilmoqda.

 

Livan tomoni keyingi muzokaralarda Isroil qo‘shinlarini olib chiqish, qo‘lga olingan fuqarolarni qaytarish va davlatlararo quruqlik chegarasini aniqlashtirish masalalarini ko‘tarishni rejalashtirmoqda.

 

Isroil esa asosiy e’tibor Hizbulloh faoliyatini cheklashga qaratilishi kerakligini ta’kidlamoqda. Elchi Leyterning bildirishicha, ushbu guruhga nisbatan yumshoq yondashuv umumiy maqsadlarga erishishni qiyinlashtiradi.

 

Shuningdek, so‘nggi kunlarda hududda qurbonlar soni oshgani qayd etildi. Livan ma’lumotlariga ko‘ra, Isroil zarbalari oqibatida bir necha kishi, jumladan jurnalist Amal Xalil halok bo‘lgan.

 

Hizbulloh vakili Hassan Fadlallah sulhni davom ettirish tarafdori ekanini bildirgan, biroq bu Isroil tomonidan kelishuv to‘liq bajarilishiga bog‘liq ekanini ta’kidlagan.

 

Ma’lumotlarga ko‘ra, 2-martdan buyon davom etayotgan harbiy harakatlar natijasida Livanda qariyb 2,5 ming kishi halok bo‘lgan. Isroil janubiy hududlarda 5–10 kilometr chuqurlikdagi hududni nazorat qilib turibdi va bu orqali o‘z shimoliy hududlarini raketa hujumlaridan himoya qilishni maqsad qilgan.

 

Isroil armiyasi janubiy Livan aholisini ushbu hududlarga yaqinlashmaslik haqida ogohlantirdi.