O‘zbekistonda migrantlar yuboradigan pul miqdori 433 million dollarga oshdi
Shuningdek, hisobot davrida mamlakatdan xorijga 604 million dollar miqdorida valyuta mablag‘lari chiqarilgan.
2026-yil yanvar—mart oylarida O‘zbekistonga xorijdan pul o‘tkazmalari hajmi o‘tgan yilning mos davriga nisbatan 13 foizga oshdi. Bu haqda Markaziy bank sharhida ma’lum qilindi.
Tahlillarga ko‘ra, mehnat muhojirlari yilning dastlabki uch oyida mamlakatga 3,8 milliard dollar miqdorida mablag‘ yuborgan. Bu ko‘rsatkich 2025-yilning shu davriga nisbatan 433 million dollarga ko‘pdir.
Markaziy bank qayd etishicha, birinchi chorakda xalqaro pul o‘tkazmalari aholining banklarga valyuta sotuvining asosiy manbai bo‘lib xizmat qilgan.
Shu bilan birga, hisobot davrida O‘zbekistondan xorijga 604 million dollar miqdorida valyuta mablag‘lari chiqarilgan. Bu esa o‘tgan yilning birinchi choragiga nisbatan 39 million dollarga kamdir.
Ma’lumotlarga ko‘ra, O‘zbekistonga yuborilayotgan pul o‘tkazmalarining qariyb 80 foizi Rossiya hissasiga to‘g‘ri keladi. Umuman olganda, 2025-yilda respublikaga chet eldan kelib tushgan pul o‘tkazmalari hajmi 18,9 milliard dollarga yetgan bo‘lib, bu 2024-yilga nisbatan 28 foizga oshgan.
Ushbu o‘sish mehnat muhojirlari faoliyat yuritayotgan davlatlarda ishchi kuchiga talabning yuqoriligi, ish haqlarining nisbatan barqarorligi, iqtisodiy faollikning oshishi hamda milliy valyutalar kursining mustahkamlanishi bilan izohlamoqda.
