Buxoroda uy-joy sohasidagi 1,8 trillion so‘mlik pul aylanmasi yashirilgan
Shavkat Mirziyoyev mamlakatda yashirin iqtisodiyotga qarshi kurashish masalalarini tanqidiy muhokama qildi.
Shavkat Mirziyoyev raisligida 24-aprel kuni o‘tkazilgan videoselektor yig‘ilishida mamlakatda yashirin iqtisodiyotga qarshi kurashish masalalari tanqidiy muhokama qilindi.
Qayd etilishicha, o‘tgan yilda ushbu yo‘nalishda alohida farmon qabul qilinib, tizimli ishlar boshlangan. Shunga qaramay, 2026-yil birinchi choragi yakunlari ayrim hududlarda muammo saqlanib qolayotganini ko‘rsatdi.
Xususan, kuzatilmaydigan iqtisodiyot ulushi Jizzax viloyati, Qashqadaryo viloyati, Namangan viloyati, Samarqand viloyati, Surxondaryo viloyati va Xorazm viloyatida 40 foizdan yuqori, Andijon viloyati, Farg‘ona viloyati hamda Buxoro viloyatida esa 30 foizdan ortiq ekani qayd etildi.
Yig‘ilishda Buxoro viloyatidagi holat alohida tahlil qilinib, o‘tgan yili faoliyatini to‘xtatgani ko‘rsatilgan 900 dan ortiq korxona joriy yilning yanvar–fevral oylarida 1,3 million kilovatt-soat elektr energiyasi va 480 ming kub metr gaz iste’mol qilgani aniqlangani ma’lum qilindi.
Shuningdek, 12,5 mingta transport vositasida yuklar norasmiy tashilgani oqibatida 40 milliard so‘m soliq tushumi yo‘qotilgani qayd etildi. Birinchi chorakning o‘zida uy-joy narxini past ko‘rsatish orqali 1 trillion 800 milliard so‘mlik pul aylanmasi yashirilgani bildirildi.
Yig‘ilish yakunida viloyat prokuraturalari, ichki ishlar organlari hamda soliq boshqarmalariga yashirin iqtisodiyotga qarshi kurashish bo‘yicha aniq metodologiya ishlab chiqib berilgani, endilikda ushbu tizim barcha hududlarda tumanlar kesimida joriy etilishi topshirilgani ma’lum qilindi.
