Toshkentda Suriyadagi jangarilarga qo‘shilishga uringan fuqaro 6 yilga qamaldi
Uning oila a’zolari va tanishlarini ham ekstremistik g‘oyalarga da’vat qilgani aniqlangan.
Toshkent shahrida yashovchi fuqaro terrorchilik faoliyatida ishtirok etishga urinish hamda yaqinlarini ekstremistik g‘oyalarga jalb qilishda aybdor deb topilib, 6 yil muddatga ozodlikdan mahrum etildi. Bu haqda DXX ma’lum qildi.
Tergov ma’lumotlariga ko‘ra, sudlanuvchi 2018-yildan buyon Suriyada yashab, qurolli to‘dalar safida harakat qilayotgan O‘zbekiston fuqarosining ta’siriga tushgan. Mazkur shaxs ijtimoiy tarmoqlar orqali sobiq qo‘shnilari, tanishlari va sinfdoshlarini radikal g‘oyalarga targ‘ib qilib kelgan.
Aniqlanishicha, toshkentlik fuqaro mojaro hududiga chiqib ketish maqsadida o‘z avtomobilini sotgan hamda Qozog‘iston va Turkiya orqali Suriyaga borish rejasini ishlab chiqqan.
Shuningdek, u oila a’zolari va hamkasblarini ham ekstremistik qarashlarga og‘dirishga uringan. Tintuv jarayonida undan diniy mutaassiblik va zo‘ravonlik g‘oyalarini targ‘ib qiluvchi materiallar topilgan.
Tergov davomida fuqaroning yana to‘rt nafar shaxsni yollagani, ular ham jangovar hududga ketishga tayyorgarlik ko‘ra boshlagani aniqlangan.
Sud majlisida sudlanuvchi aybiga iqror bo‘lib, diniy bilim yetishmasligi hamda internetdagi zararli kontent ta’siriga tushib qolganini bildirgan.
Sud qaroriga ko‘ra, u Jinoyat kodeksining 156-moddasi 2-qismi hamda 244-2-moddasi 1-qismi bilan aybdor deb topildi va 6 yil muddatga ozodlikdan mahrum etildi.
Huquqni muhofaza qiluvchi organlar mazkur jinoyat ishiga aloqador boshqa shaxslar yuzasidan tergov harakatlari davom etayotganini ma’lum qildi.
