Sankt-Peterburgda chamadondan o‘zbekistonlik ayolning jasadi topildi: 15 yoshli o‘g‘li gumonlanmoqda
Ayol 1-noyabr kuni ishga ketganidan keyin bedarak yo‘qolgan.
Rossiyaning Sankt-Peterburg shahri Vyborg tumanidagi Pargolovo qishlog‘ida chamadon ichidan ayolning jasadi topildi. Jinoyatni sodir etishda uning 15 yoshli o‘g‘li gumon qilinib, hibsga olingan. Bu haqda Rossiya Tergov qo‘mitasining mintaqaviy boshqarmasi matbuot xizmati xabar berdi.
Ma’lum qilinishicha, noyabr oyi boshida bedarak yo‘qolgan ayolning o‘limi bilan bog‘liq holat yuzasidan qotillik moddasi bo‘yicha tergov boshlangan. Tergovchilar va tezkor xodimlar olib borgan izlanishlar natijasida uning jasadi Yukkovskiy daryosi bo‘yidagi tabiat yo‘lagidan chamadon ichida topilgan.
RIA Novosti agentligiga huquqni muhofaza qiluvchi organlar xodimlari ma’lum qilishicha, ayolning bedarak yo‘qolgani haqida uning singlisi politsiyaga xabar bergan. O‘zbekistonda tug‘ilgan ayol farrosh bo‘lib ishlagan va o‘g‘li bilan ijaraga olingan xonadonda yashagan.
U oxirgi marta 1-noyabr kuni ishga borganidan keyin bedarak yo‘qolgan. Ayol telefon qo‘ng‘iroqlariga javob bermagan, biroq SMS xabarlar yuborib turgan. Xabarlarda qayerda va kim bilan ekanini bildirmagan.
Shuningdek, uning o‘g‘li maktabga onasi nomidan yozilgan, kasalligi sababli darsga kelolmasligi haqidagi xatni olib kelgan.
Hozirda 15 yoshli o‘smirga nisbatan ehtiyot chorasini tanlash masalasi hal qilinmoqda. Tergov davom etmoqda.
