AQShda Britaniya Qiroli tashrifi chog‘ida adashib Avstraliya bayroqlari ilindi
Qirolni kutib olish uchun shaharga 230 dan ortiq bayroq o‘rnatilgan bo‘lib, ular orasida Avstraliya bayroqlari ham bo‘lgan.
AQSh poytaxti Vashingtonda Britaniya qiroli Charlz III ning tashrifi oldidan tayyorgarlik jarayonida bayroqlar bilan bog‘liq xatolik kuzatildi. Bu haqda Reuters xabar berdi.
Ma’lum qilinishicha, Kolumbiya okrugi rasmiylari Oq uy yaqiniga o‘rnatilgan bayroqlar orasida Buyuk Britaniya ramzlari o‘rniga tasodifan Avstraliya bayroqlarini joylashtirib qo‘ygan. Vashington Transport departamenti vakili ushbu xato tez orada aniqlanib, bartaraf etilganini bildirgan.
Rasmiylarga ko‘ra, qirolni kutib olish uchun shaharga 230 dan ortiq bayroq o‘rnatilgan bo‘lib, ular orasida 15 ta Avstraliya bayrog‘i ham bo‘lgan. Keyinchalik ular Britaniya bayroqlari bilan almashtirilgan.
Ta’kidlanishicha, qirol Charlz ayni paytda Avstraliyaning ham davlat rahbari hisoblanadi, biroq bu maqom faqat ramziy ahamiyatga ega xolos.
Qirol Charlzning AQShga davlat tashrifi mamlakat mustaqilligining 250 yilligi munosabati bilan amalga oshirilmoqda va u hukmronlik davridagi eng muhim tashriflardan biri sifatida baholanmoqda.
Safar doirasida ikki davlat o‘rtasidagi “maxsus munosabatlar”ni mustahkamlash masalalari muhokama qilinishi kutilmoqda. So‘nggi yillarda Eron bilan bog‘liq mojaro fonida bu aloqalar sezilarli darajada sovuqlashgani qayd etilmoqda.
