Namanganda 85 mlrd so‘mlik aylanmaga ega noqonuniy qimor tarmog‘i fosh etildi
Gumonlanuvchilardan qiymati 400 million so‘mga yaqin pul mablag‘i, plastik kartalar, mobil telefonlar, kompyuter texnikalari ashyoviy dalil sifatida olingan.
Namangan viloyatining Davlatobod tumanidagi kompyuter o‘yin klubida onlayn qimor o‘yinlari tashkil etib kelgan jinoiy guruh faoliyatiga chek qo‘yildi. Bu haqda viloyat IIB xabar berdi.
Ma’lum qilinishicha, Namangan viloyati IIB axborot texnologiyalari sohasidagi jinoyatlarga qarshi kurashish boshqarmasi tomonidan o‘tkazilgan tezkor tadbirda o‘yin klubida yashirin qimor sxemasi aniqlangan. Shartli xaridor orqali 620 ming so‘m mablag‘ kiritilib, ushbu pul qimor platformasi akkauntiga o‘tkazilganidan so‘ng jinoiy guruh a’zolari ushlangan.
Tergovga qadar tekshiruvga ko‘ra, Chust tumani “Guliston” mahallasida yashovchi 1985-yilda tug‘ilgan shaxs ishonchli sheriklari bilan birga maxsus jinoiy guruh tashkil qilgan.
Guruh faoliyati davomida maxsus ilovadagi hisoblarda 796,6 million so‘m limit mablag‘i va 44,6 milliard so‘mlik tranzaksiya, boshqa bir hisobda esa 115,6 million so‘m limit va 26,6 milliard so‘mlik aylanma qayd etilgan. Shuningdek, kriptovalyuta orqali 14,6 milliard so‘mlik pul aylanmasi amalga oshirilgani aniqlangan.
Umumiy hisobda jinoiy faoliyat aylanmasi 85 milliard so‘mni tashkil etgan. Tezkor tadbir davomida gumonlanuvchilardan 26 990 AQSh dollari, 73 million so‘m naqd pul, 10 ta plastik karta, mobil telefonlar, kompyuter texnikalari hamda pul sanash uskunasi ashyoviy dalil sifatida olingan.
Holat yuzasidan O‘zbekiston Jinoyat kodeksining 278-moddasi 2-qismi “b” bandi bilan jinoyat ishi qo‘zg‘atilgan, gumonlanuvchilarga nisbatan qamoqqa olish ehtiyot chorasi qo‘llangan. Tergov harakatlari davom etmoqda.
