Netanyaxu saratondan tuzalganini ma’lum qildi
U 2023-yilda yurak stimulyatori o‘rnatgan, 2024-yilda churra bilan bog‘liq operatsiya o‘tkazgan, o‘tgan yili ingichka ichak shilliq qavatining yallig‘lanishi bilan davolangan.
Isroil bosh vaziri Binyamin Netanyaxu erta bosqichda aniqlangan saraton kasalligidan tuzalganini bildirdi. Bu haqda Point.md xabar berdi.
Uning so‘zlariga ko‘ra, 2024-yil oxirida unda prostata adenomasi aniqlanib, shu sabab operatsiya o‘tkazilgan. Biroq Netanyaxuning ta’kidlashicha, keyingi tekshiruvlar davomida unda erta bosqichdagi yomon sifatli o‘sma ham aniqlangan.
“Men muammoni izsiz bartaraf etgan maqsadli davolanish kursini tanladim”, — deb yozdi 76 yoshli siyosatchi ijtimoiy tarmoqlarda.
U davolanish qachon va qanday o‘tkazilgani haqida aniq ma’lumot bermagan, biroq hozir o‘zini sog‘lom his qilayotganini qayd etgan.
Der Spiegel Netanyaxu avval ham bir necha bor sog‘lig‘i bilan bog‘liq muammolar sabab shifoxonaga yotqizilganini yozmoqda. Xususan, 2023-yil yozida unga yurak stimulyatori o‘rnatilgan, 2024-yilda esa churra bilan bog‘liq operatsiyani boshidan kechirgan va o‘tgan yili enterit — ingichka ichak shilliq qavatining yallig‘lanishi bilan davolangan.
