Rim papasi Livanda halok bo‘lgan musulmon bolaning rasmini o‘zi bilan olib yurishini aytdi
Bola papa mamlakatga borganda uni kutib olganlar qatorida bo‘lgan.
Rim papasi Leo XIV Afrikaga amalga oshirgan safari yakunida samolyot bortida o‘tkazilgan matbuot anjumanida Livanda halok bo‘lgan musulmon bolaning suratini o‘zi bilan olib yurishini ma’lum qildi. Bu haqda AP xabar berdi.
Qayd etilishicha, bola Isroil va “Hizbulloh” o‘rtasidagi so‘nggi mojaro chog‘ida halok bo‘lgan. U o‘tgan yili Leo XIV ning Livanga tashrifi chog‘ida papani kutib olish uchun plakat ko‘tarib suratga tushgan.
Shuningdek, pontifik AQSh va Eronni urushni tugatish bo‘yicha muzokaralarga qaytishga chaqirdi. Rim papasi mojaro yuzaga kelganda zo‘ravonlikka murojaat qilish o‘rniga “tinchlik madaniyati”ni shakllantirish zarurligini ta’kidladi.
Uning so‘zlariga ko‘ra, asosiy masala Eron rejimini o‘zgartirish emas, balki ko‘plab begunoh insonlar qurbon bo‘lmasdan turib umumiy qadriyatlarni ilgari surish yo‘llarini topishdan iborat.
Safar davomida Papa AQSh prezidenti Donald Tramp bilan urush masalasida yuzaga kelgan ochiq bahslar fonida tomonlarni diplomatik muloqotni tiklashga undadi.
Bundan tashqari, u davlatlar o‘z chegaralarini nazorat qilish huquqiga ega ekanini tan olgan holda, migrantlarga nisbatan insoniy munosabatni saqlash zarurligini qayd etdi.
Matbuot anjumanida Papa o‘lim jazosiga nisbatan keskin munosabat bildirdi. U barcha adolatsiz jazolarni qoralab, inson hayoti tug‘ilishdan tabiiy o‘limgacha hurmat qilinishi va himoya qilinishi lozimligini ta’kidladi.
“Har qanday davlat yoki rejim tomonidan inson hayotini nohaq olib qo‘yishga olib keladigan qarorlar qoralanishi kerak,” — dedi u.
