Samarqandda voyaga yetmagan ikki qizga nisbatan zo‘ravonlik sodir etildi
Vasiy ayol bolalarning xorijda bo‘lib turgan onasidan pul undirish maqsadida ularga bosim o‘tkazib, zo‘ravonlik holatini videoga olgan.
Ijtimoiy tarmoqlarda voyaga yetmagan ikki nafar qizga nisbatan zo‘ravonlik sodir etilgani aks etgan videotasvirlar yuzasidan holat Bolalar ombudsmani tomonidan nazoratga olindi.
Aniqlanishicha, joriy yilning 21-aprel kuni Samarqand viloyati Toyloq tumanida fuqaro M.S. vaqtincha vasiyligida bo‘lgan ikki nafar voyaga yetmagan (2017 va 2019-yilda tug'ilgan) qizga nisbatan jismoniy va ruhiy tazyiq o‘tkazgan. Dastlabki ma’lumotlarga ko‘ra, u xorijda bo‘lib turgan bolalarning onasidan pul undirish maqsadida bosim o‘tkazib, zo‘ravonlik holatini videoga olgan.
Mazkur holat yuzasidan Bolalar ombudsmanining Samarqand viloyatidagi mintaqaviy vakili voqea joyiga chiqib, vaziyatni o‘rgangan hamda bolalarni himoya qilish bo‘yicha zarur tezkor choralarni ko‘rgan.
Hozirda tuman ichki ishlar organlari tomonidan tergovga qadar tekshiruv harakatlari olib borilmoqda. Shuningdek, tuman vasiylik organi — “Inson” markazi mas’ullari tomonidan M.S. vasiylik vazifasidan chetlatilgan.
Bolalarga yetkazilgan tan jarohatlari darajasini aniqlash maqsadida sud-tibbiyot ekspertizasi tayinlangan. Ularning ruhiy holatini tiklash va psixologik barqarorligini ta’minlash uchun mutaxassis-psixolog jalb etilgan.
Shuningdek, voyaga yetmagan qizlar tumandagi oilaviy bolalar uyiga joylashtirilib, yashash hududiga yaqin maktab hamda maktabgacha ta’lim muassasasiga rasmiylashtirilgan. Shu tariqa bolalarning xavfsiz muhitda yashash va ta’lim olish huquqlari ta'minlangan.
