Toshkentda elektr tarmoqlari korxonasi muhandislari 8 ming dollar pora bilan ushlandi
Ular tadbirkorning 400 million so‘mlik jarimasini kamaytirib berish uchun pul talab qilgan.
Toshkent shahri tumanlaridan birida faoliyat yurituvchi elektr tarmoqlari korxonasining ikki nafar muhandisi pora olishda gumon qilinib ushlandi. Bu haqda Zamon.uz’ga DXX xabar berdi.
Ma’lum bo‘lishicha, ular tijorat bank filiali binosida o‘rnatilgan elektr hisoblagich noto‘g‘ri sxema orqali tarmoqqa ulangani sabab elektr energiyasi noto‘g‘ri hisoblanayotgani haqida dalolatnoma rasmiylashtirgan. Shundan so‘ng, hisoblagichni o‘rnatgan mas’ul MCHJ rahbaridan mazkur dalolatnoma bo‘yicha hisoblangan 400 million so‘m jarimani 65 million so‘mga kamaytirib berish evaziga 8 ming AQSH dollari talab qilgan.
Tezkor tadbir davomida Davlat xavfsizlik xizmati Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan muhandislar pul mablag‘ini uchinchi shaxs orqali olgan vaqtda qo‘lga olindi.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
