Xalqaro biologiya olimpiadasi: 100 ga yaqin iqtidorli yosh kuch sinashmoqda

Namanganda Abu Ali ibn Sino nomidagi xalqaro biologiya olimpiadasi bo‘lib o‘tmoqda. 

 

 

Unda dunyoning 12 ta mamlakati — Turkiya, Tailand, Malayziya, Rossiya, Ozarbayjon, Belarus, Mo‘g‘uliston, Qozog‘iston, Qirg‘iziston, Tojikiston, Turkmaniston davlatlaridan kelgan hamda O‘zbekiston vakillaridan iborat, jami 94 nafar o‘quvchi-yoshlar ishtirok etmoqda. 

 

Qayd etilishicha, bundan ko‘zlangan maqsad — buyuk ajdodlarning jahon sivilizatsiyasi rivojiga qo‘shgan ulkan hissasini xalqaro miqyosda keng targ‘ib qilish, iqtidorli o‘quvchilarni qo‘llab-quvvatlashdan iborat. 

 

 

15-18 yoshli o‘smirlar o‘rtasida o‘tkazilayotgan Abu Ali Ibn Sino nomidagi xalqaro biologiya olimpiadasi 2 turda tashkil etiladi.

 

 

Bunda 1-tur laboratoriya (nazariy) shaklida, 2-tur yozma ish (nazariy) shaklida o‘tkaziladi. Yakuniy natijalarga ko‘ra g‘olib va sovrindor, deb topilgan jamoa vakillari oltin, kumush, bronza medallari, diplom va esdalik sovg‘alari bilan taqdirlanadi.

 

 

Olimpiada doirasida o‘quvchi-yoshlar uchun xalqaro mutaxassislar ishtirokida bir qator mahorat darslari o‘tkazildi. Bundan tashqari, olimpiada ishtirokchilari va mehmonlar uchun Namanganning tarixiy va madaniy obidalariga sayohatlar tashkil etildi. 

 

 

Mazkur olimpiada biologiya fani bo‘yicha joriy yilning iyul oyida  Litvada o‘tkaziladigan Xalqaro biologiya olimpiadasiga navbatdagi tayyorgarlik bosqichi bo‘lib xizmat qiladi.

 

Ma’lumotlarga ko‘ra, bu yil ikkinchi marta o‘tkazilayotgan mazkur olimpiada ilk bora 2024-yilning 9-14-iyun kunlari Buxoroda bo‘lib o‘tgan.

 

Unda o‘zbekistonlik o‘quvchilar 12 ta (3 ta oltin, 3 ta kumush, 6 ta bronza) medalni qo‘lga kiritgan.