Toshkentda Cobalt ishtirokidagi YTHda bir kishi halok bo‘ldi
Ma’lumotlarga ko‘ra, piyoda yo‘lning belgilanmagan qismidan o‘tayotgan paytda hodisa yuz bergan.
Toshkent shahrining Yakkasaroy tumanida piyoda ishtirokida sodir bo‘lgan yo‘l-transport hodisasi oqibatida bir kishi halok bo‘ldi.
Toshkent shahar IIBB YHXB Axborot xizmatinig ma’lum qilishicha, 25-aprel kuni soat 17:40 atrofida Yakkasaroy tumani KXAY ko‘chasida harakatlanib ketayotgan 1988-yilda tug‘ilgan haydovchi boshqaruvidagi Cobalt rusumli avtomobil 1948-yilda tug‘ilgan piyodani urib yuborgan.
Dastlabki ma’lumotlarga ko‘ra, piyoda yo‘lning belgilanmagan qismidan o‘ng tomondan chap tomonga o‘tayotgan vaqtida hodisa yuz bergan.
Yo‘l-transport hodisasi oqibatida piyoda olgan tan jarohatlari sabab voqea joyida vafot etgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
