Tramp tadbiridagi otishmada gumondorning nishoni "ma'muriyat amaldorlari" bo‘lgan
Otishma oqibatida Maxfiy xizmat xodimlaridan biri yaralangan.
AQSh prezidenti Donald Tramp ishtirok etgan Vashingtondagi rasmiy tadbirda otishma sodir etganlikda gumon qilinib qo‘lga olingan shaxsning asosiy nishoni ma’muriyat amaldorlari bo‘lgani aytdi, deb xabar berdi CBS News manbalarga tayanib.
Ma'lumotlarga ko‘ra, hibsga olingan Koul Allen tergov organlariga Tramp ma’muriyati vakillariga hujum uyushtirish niyatida bo‘lganini bildirgan. Shu bilan birga, uning to‘g‘ridan-to‘g‘ri AQSh prezidentini nishonga olgani tasdiqlanmagan.
Dastlabki ma’lumotlarga ko‘ra, gumondor Kaliforniya shtatining Torranse shahrida tug‘ilgan. U oliy ta’lim muassasasini tamomlagan va keyingi yillarda ta’lim sohasida faoliyat yuritgan.
Politsiya ma’lumotiga ko‘ra, u tadbirga taklif etilgan mehmonlar orasida bo‘lgan hamda ilgari huquqni muhofaza qiluvchi organlar e’tiboriga tushmagan. Erkak tadbir hududiga to'pponcha va bir nechta pichoq bilan qurollangan holda kirgani aniqlangan.
Otishma oqibatida AQSh Maxfiy xizmati xodimlaridan biri jarohat olgan. Gumondor voqeadan keyin qo‘lga olinib, tibbiy ko‘rik uchun shifoxonaga yuborilgan.
Huquq-tartibot idoralari hodisaning aniq maqsadi va ehtimoliy aloqador shaxslarni aniqlash bo‘yicha tergovni davom ettirmoqda. Dastlabki taxminlarga ko‘ra, gumondor yolg‘iz harakat qilgan.
