Navbahor Hamidova World Boxing kubogida ikki karra chempion bo‘ldi
U Ostona shahrida bo‘lib o‘tgan 2025-yilgi turnirda ham oltin medalni qo‘lga kiritgan.
Braziliyaning Foz do Iguasu shahrida o‘tkazilayotgan World Boxing kubogida o‘zbekistonlik bokschi Navbahor Hamidova yana bir bor yuqori natija qayd etdi. Bu haqda O‘zbekiston boks federatsiyasi xabar berdi.
Ma’lum qilinishicha, -65 kg vazn toifasida yarim final bosqichida ringga ko‘tarilgan Hamidova angliyalik Saxa Hikeyni 3:2 hisobida mag‘lub etib, final yo‘llanmasini qo‘lga kiritdi.
Hal qiluvchi bahsda esa u qozog‘istonlik Aida Abikeyevaga qarshi ishonchli jang o‘tkazib, 5:0 hisobida mutlaq ustunlik bilan g‘alaba qozondi va turnir chempioniga aylandi.
Qayd etilishicha, Navbahor Hamidova avval ham — 2025-yilda Ostona shahrida bo‘lib o‘tgan World Boxing kubogida oltin medalni qo‘lga kiritgan. O‘sha finalda u turkiyalik mashhur bokschi, Olimpiada chempioni Busenaz Surmenelini mag‘lub etgan.
Shu tariqa, Hamidova mazkur musobaqa tarixida ikki karra chempion sifatida o‘z nomini mustahkamladi.
