Turkiyadagi boks turniri ommaviy janjal bilan yakunlandi
Mushtlashuvda bir nechta rossiyalik sportchilar jarohat olgan.
Turkiyaning Trabzon shahrida o‘tkazilgan boks turniri yakunida ommaviy janjal yuz berdi. Hodisa Universal Boxing Organization (UBO) yo‘nalishi bo‘yicha jahon chempionlik kamari uchun kechgan jangdan so‘ng sodir bo‘lgan.
Musobaqada rossiyalik bokschi Sergey Goroxov turkiyalik Emirhan Kalkan bilan ringga ko‘tarilgan. Jang yakunida hakam g‘olib nomini e’lon qilganidan so‘ng vaziyat keskinlashib, bir necha o‘nlab shaxslar ringga chiqib ketgan.
Natijada sportchilar jamoalari, murabbiylar va tomoshabinlar ishtirokida ommaviy mushtlashuv kelib chiqqan. Dastlabki ma’lumotlarga ko‘ra, hodisa davomida rossiyalik sportchi jamoasining bir necha a’zosi turli darajadagi tan jarohatlari olgan.
Manbalarga ko‘ra, jabrlanganlar tibbiy yordam olish uchun shifoxonaga murojaat qilgan. Ayrim ma’lumotlarda janjal rossiyalik bokschining g‘alabani hissiyot bilan nishonlagani ortidan boshlangan bo‘lishi mumkinligi qayd etilgan.
