Samarqandda bolani urgan xususiy bog‘cha tarbiyachisi ishdan olindi
Hozirda ushbu voqea bo‘yicha huquqni muhofaza qiluvchi organlar tomonidan qo‘shimcha tekshiruv ishlari olib borilmoqda.
Samarqand viloyatining Urgut tumanida joylashgan xususiy maktabgacha ta’lim muassasasida tarbiyachining bolaga nisbatan qo‘l ko‘targani aks etgan videotasvirlar ijtimoiy tarmoqlarda keng muhokamalarga sabab bo‘ldi. Holat yuzasidan mas’ul tashkilotlar tomonidan rasmiy o‘rganish ishlari olib borildi.
Viloyat Maktabgacha va maktab ta’limi boshqarmasi ma’lum qilishicha, voqea “Madina Ko‘zmunchoq” nodavlat maktabgacha ta’lim muassasasida sodir bo‘lgan. Mazkur ta’lim tashkiloti 2019-yil avgust oyidan buyon litsenziya asosida faoliyat yuritib kelmoqda.
Hozirgi vaqtda muassasada 6 ta guruh faoliyat yuritib, jami 147 nafar tarbiyalanuvchi ta’lim-tarbiya olmoqda.
O‘rganishlar davomida aniqlanishicha, joriy yilning 20-aprel kuni o‘rta guruh tarbiyachisi M.D. tomonidan tarbiyalanuvchiga nisbatan jismoniy zo‘ravonlik sodir etilgan.
Mazkur holat yuzasidan 2026-yil 23-aprel kuni tashkilot rahbarining buyrug‘i asosida tarbiyachi M.D. bilan tuzilgan mehnat shartnomasi bekor qilingan.
Hozirda ushbu voqea bo‘yicha huquqni muhofaza qiluvchi organlar tomonidan qo‘shimcha tekshiruv ishlari olib borilmoqda.
