Toshkentda “Glamour Gold” qurilish kompaniyasi 300 ga yaqin kishini uysiz qoldirdi

Toshkent shahrida yangi uy sotib olish niyatida bo‘lgan qariyb 300 nafar fuqaroni aldagan Glamour Gold mansabdorlariga nisbatan jinoyat ishi tergov qilindi. Bu haqda Toshkent shahar IIBB matbuot xizmati xabar berdi.

 

Ma’lum qilinishicha, Glamour Gold MCHJ tomonidan amalga oshirilgan “Ecodream” turar joy majmuasi qurilishi loyihasi doirasida jami 274 nafar fuqaro firibgarlik qurboniga aylangan. Ular tomonidan uy sotib olish uchun to‘langan mablag‘lar qaytarilmagan.

 

Tergov hujjatlariga ko‘ra, 2020-yil 16-mart holatiga mazkur qurilish uchun 37 mlrd 400 mln so‘m sarflangan. Qolgan mablag‘lar esa maqsadli yo‘nalishda ishlatilmay, talon-toroj qilingan. Oqibatda, fuqarolarga yetkazilgan umumiy moddiy zarar 97 mlrd so‘mni tashkil etgan. Olti yil avval boshlangan mazkur qurilish loyihasi amalda soxta sxema ekani ma’lum bo‘lgan.

 

Zararni qoplash maqsadida gumondorlarga tegishli bo‘lgan umumiy qiymati 65 mlrd 582 mln so‘mlik ko‘chmas mulklar, transport vositalari va boshqa mol-mulklar xatlanib, taqiq qo‘yilgan.

 

Jabrlanuvchilardan biriga ko‘ra, qurilish jarayonining kechikishi turli bahonalar bilan izohlangan.

 

Hozirda kompaniyaning to‘qqiz nafar mas’ul shaxsiga nisbatan O‘zbekiston Respublikasi Jinoyat kodeksining 167-moddasi 3-qismi (o‘zlashtirish yoki rastrata), 168-moddasi 4-qismi “a”, “v” bandlari (firibgarlik), 228-moddasi 2 va 3-qismlari (hujjatlarni qalbakilashtirish),  192-11-moddasi 2-qismi “a”, “b” bandlari (mansab vakolatlarini suiiste’mol qilish) bilan ayblov e’lon qilingan.

 

Mazkur shaxslarga nisbatan qamoqqa olish tarzidagi ehtiyot chorasi qo‘llangan.

 

Huquqni muhofaza qiluvchi organlar ushbu kompaniyadan jabr ko‘rgan boshqa fuqarolar bo‘lsa, Toshkent shahar IIBB huzuridagi Tergov boshqarmasiga murojaat qilishlarini so‘ramoqda.