Epshteynning orolidagi “masjid”ga O‘zbekistondan koshin olib kelingan — NYT
Epshteyn ushbu loyiha uchun Ka’badan keltirilgan kisvadan, Suriya me’morchiligi nusxasidan foydalangan.
AQSh Adliya vazirligi e’lon qilgan hujjatlar amerikalik moliyachi Jeffrey Epsteinning Yaqin Sharq bilan aloqalari va uning shaxsiy orolidagi g‘ayrioddiy inshoot ortidagi rejalari haqida yangi tafsilotlarni yuzaga chiqardi. Bu haqda The New York Times xabar bermoqda.
Ma’lumotlarga ko‘ra, Epshteyn Karib dengizidagi kichik Avliyo Jeyms orolida joylashgan va uzoq vaqt davomida turlicha talqin qilingan bino — aslida “masjid” sifatida loyihalashtirilgan. Ko‘k-oq rangli, oltin gumbaz bilan bezatilgan ushbu inshoot qadimgi Yaqin Sharq me’morchiligi, xususan Suriyadagi hammom namunalaridan ilhomlangan.
Hujjatlarda qayd etilishicha, Epshteyn ushbu loyihani bezash uchun noyob islomiy artefaktlarni yig‘gan. Jumladan, Ka’badan olingan kisva, shuningdek O‘zbekistondagi masjidlardan keltirilgan bezak plitkalari(koshinlar) ishlatilgan. Ayrim ma’lumotlarga ko‘ra, Ka’baning ichki va tashqi qoplamasiga tegishli bo‘lgan mato bo‘laklari ham Epshteyn ixtiyoriga berilgan.
Tergov materiallari Epshteynning ushbu loyihani amalga oshirish jarayonida Yaqin Sharqdagi yuqori darajadagi aloqalardan foydalanganini ham ko‘rsatadi. Xususan, u Saudiya Arabistoni valiahd shahzodasi Muhammad bin Salmon bilan uchrashuv o‘tkazgan va qirollik doiralari bilan yaqin munosabatlar o‘rnatishga harakat qilgan.
Shuningdek, hujjatlarda norvegiyalik diplomat Terje Rod-Larsen orqali Saudiya rasmiylari bilan aloqalar yo‘lga qo‘yilgani qayd etilgan. Epshteyn hatto Saudiya Arabistoni bilan moliyaviy hamkorlik o‘rnatish va yirik iqtisodiy loyihalarda ishtirok etishga intilgan.
Ekspertlar ta’kidlashicha, Epshteynning ushbu faoliyati uning ikki maqsadini — nufuzli shaxslar bilan aloqalarni kengaytirish va noyob san’at hamda diniy buyumlar to‘plamini boyitishni — birlashtirgan.
Eslatib o‘tamiz, Jeffri Epshteyn 2019-yilda jinsiy savdo ayblovlari bo‘yicha sud jarayonini kutayotgan paytda qamoqda vafot etgan. Rasmiy hujjatlarda u o‘zini o‘ldirgani qayd etilgan. Mazkur yangi hujjatlar esa uning faoliyati va aloqalari haqidagi bahslarni yana kun tartibiga olib chiqdi.
