Qozog‘istonda “oltin viza” tizimi joriy etiladi

 

Qozog‘iston prezidenti Qosim-Jomart Toqayev mamlakat migratsiya siyosatini takomillashtirishga qaratilgan farmonni imzoladi. Hujjatga ko‘ra, iqtidorli mutaxassislar va investorlarni jalb qilish hamda ularning mamlakatda faoliyat yuritishini soddalashtirish ko‘zda tutilgan.

 

Mazkur islohot doirasida “Altyn Visa” — ya’ni “oltin viza” tizimini joriy etish rejalashtirilmoqda. Ushbu viza egalariga davlat xizmatlaridan foydalanishda Qozog‘iston fuqarolari bilan tenglashtirilgan maqom beriladi. Shuningdek, ular uchun soliq imtiyozlari joriy etilib, shaxsiy daromad solig‘i, mol-mulk va yer solig‘i hamda umumiy daromad deklaratsiyasi topshirish majburiyati bekor qilinadi.

 

Farmonga muvofiq, investorlar va top-menejerlar uchun biznes vizalari, olimlar, shifokorlar, madaniyat arboblari hamda yetakchi xorijiy universitetlar bitiruvchilari uchun maxsus ishchi vizalar joriy etiladi. Bundan tashqari, investitsiya loyihalarida ishtirok etuvchi shaxslar uchun alohida vaqtinchalik ishchi vizalar ham nazarda tutilgan.

 

Hujjatda xorijiy diplomlarni nostrifikatsiyasiz tan olish, ya’ni ularni avtomatik ravishda e’tirof etish tizimini yo‘lga qo‘yish ham belgilangan. Shu bilan birga, chet elliklar uchun “yagona oyna” tamoyili asosida ariza topshirish imkonini beruvchi raqamli platformalar yaratiladi.

 

Ostona va Olmaota shaharlarida xorijiy fuqarolar uchun ingliz tilida xizmat ko‘rsatish zonalarini tashkil etish, shuningdek, innovatsion yo‘nalishlarda, jumladan sun’iy intellekt sohasida yangi platformalarni ishga tushirish rejalashtirilgan.

 

Farmonga ko‘ra, Ostona xalqaro moliya markazi faoliyatiga ham o‘zgartirishlar kiritiladi. Xususan, soliq rezidentligini olish uchun mamlakatda bo‘lish muddati 90 kundan 30 kungacha qisqartiriladi.

 

Mazkur choralar Qozog‘istonni investitsiyalar va yuqori malakali kadrlarni jalb qilish bo‘yicha mintaqaviy markazga aylantirishga qaratilgan.