Buxoroda erkakni “shantaj” qilgan ayollar ushlandi
Ayollardan biri erkak bilan ishqiy munosabatda bo‘lgan va yozishmalarni tarqatmaslik uchun pul talab qilgan.
Buxoro viloyati Vobkent tumanida ikki ayol o‘zaro til biriktirib, oilali erkakni shantaj qilish orqali pul talab qilgani uchun qo‘lga olindi. Bu haqda viloyat IIB xabar berdi.
Ma’lum qilinishicha, jabrlanuvchi erkak va 1991-yilda Qorako‘l tumanida tug‘ilgan ayol o‘rtasida ishqiy munosabatdagi yozishmalar bo‘lgan. Ushbu yozishmalarni ayolning dugonasi ko‘rib qolgan va ularni oshkor qilish bilan unga tahdid qilgan. Dastlab ayol dugonasiga pul berib, vaziyatni yopishga uringan.
Keyinchalik ikki ayol o‘zaro til biriktirib, ushbu holatdan moddiy manfaat ko‘rishni rejalashtirgan. Ayol erkak bilan bog‘lanib, yozishmalar oshkor etilishi mumkinligini bildirib, unga bosim o‘tkazgan. Ular sirni erkakning oilasi va turmush o‘rtog‘iga yetkazish bilan qo‘rqitib, jami 6 mln 800 ming so‘m miqdorida pul talab qilgan.
Tezkor tadbir davomida gumonlanuvchi ayollardan biri erkakka tegishli avtomobilda 100 AQSH dollari va 5 mln 600 ming so‘mni olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 165-moddasi (tovlamachilik) 2-qismi “v” bandi bilan jinoyat ishi qo‘zg‘atilib, tergov harakatlari olib borilmoqda.
