Namanganda ayollarni fohishalikka yuborib kelgan jinoiy guruh ushlandi
Guruh vositachilar orqali asosan yosh, turmushdan ajragan va ijtimoiy himoyaga muhtoj ayollarni ko‘zlagan.
Namangan viloyatida ayollarni xorijga olib chiqib, fohishalikka yuborish bilan shug‘ullangan jinoiy guruh fosh bo‘ldi. Bu haqda Ichki ishlar vazirligi xabar berdi.
Ma’lum qilinishicha, 26-aprel kuni Pop tumanida o‘tkazilgan tezkor tadbir davomida Davlatobod tumanida yashovchi ayrim ayollar o‘zlarini turli ismlar — Nargiza, Maftuna va Malika deb tanishtirib, fuqarolar ishonchiga kirgani aniqlangan. Ular Davlatobod tumani “Yuksalish” mahallasida yashovchi boshqa ayol bilan til biriktirib, jinoiy faoliyat yuritgan.
Tergov ma’lumotlariga ko‘ra, guruh vositachilar orqali asosan yosh, turmushdan ajragan va ijtimoiy himoyaga muhtoj ayollarni nishonga olgan. Ular xorijdagi sheriklari orqali ish va yuqori daromad va’dasi bilan ayollarni aldab, chet elga olib chiqish va fohishalikka jalb qilish bilan shug‘ullangan.
Tezkor tadbir o‘tkazilgan kuni Davlatobod tumanida yashovchi, 2001-yilda tug‘ilgan ayolni Hindistonga fohishalik uchun yuborishga urinish vaqtida guruh a’zolari qo‘lga olingan.
Mazkur holat yuzasidan O‘zbekiston Respublikasi Jinoyat kodeksining 135-moddasi 2-qismi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
Ichki ishlar vazirligi fuqarolarni, ayniqsa xorijda ishlash bilan bog‘liq shubhali takliflarga ishonmaslikka chaqirdi. Shuningdek, noqonuniy holatlar haqida ma’lumotga ega bo‘lgan shaxslardan zudlik bilan huquqni muhofaza qiluvchi organlarga murojaat qilish so‘raldi.
Avvalroq Toshkentda 4 nafar qizni aldab, ulardan birini Dubayga olib ketayotgan ayol aeroportda qo‘lga olingani haqida xabar berilgandi.
