Navoiy viloyatida yana og‘ir YTH: ikki kishi halok bo‘ldi
Viloyatda so‘nggi ikki oyda YTHlar soni ortib, 11 nafar fuqaro vafot etgan.
Navoi viloyatining Konimex tumani hududidan o‘tuvchi A-379 “Navoiy–Uchquduq” avtomobil yo‘lida yo‘l-transport hodisasi sodir bo‘ldi. Bu haqda viloyat Ichki ishlar boshqarmasi ma’lum qildi.
Dastlabki ma’lumotlarga ko‘ra, 2000-yilda tug‘ilgan N.J. boshqaruvida bo‘lgan “Nexia-3” rusumli avtomobil tezlikni oshirgan holda harakatlanib, yo‘lning xavfli burilish qismida boshqaruvni yo‘qotgan. Natijada avtomobil qarama-qarshi yo‘nalishga chiqib ketib, 1993-yilda tug‘ilgan M.A. boshqaruvidagi “Scania 114L” yuk mashinasi bilan to‘qnashgan.
YTH oqibatida “Nexia-3” haydovchisi va undagi yo‘lovchi olgan og‘ir tan jarohatlari sababli voqea joyida vafot etgan. Yana bir yo‘lovchi tan jarohatlari bilan shifoxonaga yotqizilgan.
Hozirda mazkur holat yuzasidan jinoyat ishi qo‘zg‘atilib, tergovga qadar tekshiruv harakatlari olib borilmoqda.
Avvalroq ham Navoi viloyatida Nexia haydovchisi quvib o‘tish qoidalarini buzgan holda yuk mashinasi bilan to‘qnashib, 4 nafar fuqaro hayotdan ko‘z yumgan edi. Oradan 15 kun o‘tib esa Kia va Chery rusumli avtomobillar ishtirokida sodir bo‘lgan YTH oqibatida 5 kishi vafot etgan edi.
