AQShda samolyot qulashi oqibatida 5 kishi halok bo‘ldi

AQSHning Texas shtatida Pikcleball jamoasini musobaqaga olib ketayotgan kichik samolyot halokatga uchradi. Oqibatda bortda bo‘lgan besh kishining barchasi halok bo‘ldi. Bu haqda Fox News xabar berdi.

 

Mahalliy hokimiyat va politsiya ma’lumotiga ko‘ra, hodisa Ostin shahridan taxminan 40 mil (64 km) janubi-g‘arbida joylashgan Uimberli shahrida sodir bo‘lgan.

 

Politsiya serjanti Billi Reyning ma’lum qilishicha, samolyotdagi uchuvchi va to‘rt nafar yo‘lovchi voqea joyidayoq halok bo‘lgani tasdiqlangan. Halok bo‘lganlarning shaxsi hozircha oshkor etilmagan.

 

Rasmiylar voqea bo‘yicha tergov ishlari AQSH federal aviatsiya organlari tomonidan olib borilayotganini bildirdi.

 

Ma’lum qilinishicha, samolyot Texas shtati Amarillo shahridagi Amarillo Pickleball Club a’zolarini turnirga olib ketayotgan bo‘lgan. Klub prezidenti Den Dayer halok bo‘lganlardan to‘rt nafari bilan avval ham ko‘p marta birga o‘ynaganini aytib, ularni tajribali va g‘alaba uchun harakat qiluvchi sportchilar sifatida ta’rifladi.

 

Shu vaqtda Amarillodan turnirga yo‘l olgan ikkinchi samolyot ham bo‘lgan. Rasmiylarga ko‘ra, u Nyu-Braunfels aeroportiga muvaffaqiyatli qo‘ngan. Havo harakati dispetcherlari yozuvlariga ko‘ra, muammoga uchragan samolyot radardan yo‘qolishidan oldin noaniq harakatlar qilgan.

 

Hodisa joyida samolyotning favqulodda signal tizimi ishga tushgani qayd etilgan. Shundan so‘ng dispetcherlar 911 xizmatiga qo‘ng‘iroq qilgan.

 

Milliy ob-havo xizmati ma’lumotiga ko‘ra, hodisa sodir bo‘lishidan oldin hududda osmon qisman bulutli bo‘lgan, keyinroq esa momaqaldiroqli yomg‘ir kuzatilgan.

 

Uimberli va Nyu-Braunfels shaharlari Texasning sayyohlik bilan mashhur Xill Kantri hududida joylashgan.