Tramp Hormuz bo‘g‘ozida qolib ketgan kemalarni chiqarish bo‘yicha operatsiya e’lon qildi

AQSH prezidenti Donald Tramp Hormuz bo‘g‘ozida qolib ketgan xorijiy kemalarni xavfsiz olib chiqishga qaratilgan maxsus operatsiya boshlanishini ma’lum qildi.

 

U Truth Social ijtimoiy tarmog‘idagi bayonotida “dunyoning turli mamlakatlari” AQSHdan Hormuz bo‘g‘ozida qolib ketgan kemalarini ozod qilishda yordam so‘raganini aytdi. Unga ko‘ra, Vashington mazkur davlatlar kemalariga hamrohlik qilib, ularni cheklangan suv hududidan xavfsiz chiqarishni rejalashtirmoqda.

 

Oq uy rahbari ta’kidlashicha, “Ozodlik loyihasi” deb nomlangan operatsiya dushanba kuni ertalab, Yaqin Sharq vaqti bilan boshlanadi. U bu tashabbusni AQSH va Yaqin Sharq mamlakatlari, “ayniqsa Eron” ishtirokida amalga oshirilayotgan gumanitar qadam sifatida baholadi.

 

Shuningdek, Tramp Eron bilan muzokaralar ijobiy ruhda kechayotganini bildirib, bu muloqotlar barcha tomonlar uchun ijobiy natijalarga olib kelishi mumkinligini qayd etdi.

 

Oradan ko‘p o‘tmay, Eron parlamenti milliy xavfsizlik bo‘yicha komissiyasi rahbari Ibrohim Azizi AQSHning Hormuz bo‘g‘ozidagi vaziyatga har qanday aralashuvi sulh rejimi buzilishi sifatida baholanishini ma’lum qildi.