Toshkentdagi ayrim maktablarda davomat “aqlli” kameralar orqali nazorat qilinadi

Ijtimoiy tarmoqlarda maktab o‘quvchilari davomatini “aqlli” kameralar orqali nazorat qilish joriy etilishi haqidagi xabarlar muhokamalarga sabab bo‘ldi. Holat yuzasidan Maktabgacha va maktab ta’limi vazirligi rasmiy izoh berdi.

 

Ma’lum qilinishicha, ayni paytda Toshkent shahrining Mirzo Ulug‘bek tumanidagi ayrim maktablarda “aqlli” kameralar sinov tariqasida o‘rnatilmoqda. Ular davomatni nazorat qilish jarayonini yanada samarali tashkil etishga yordam berishi kutilmoqda.

 

Qayd etilishicha, bunday texnologiyalar nafaqat maktab ma’muriyati, balki ota-onalar uchun ham farzandlarning darslarga qatnashishi va xavfsizligini onlayn nazorat qilish imkonini yaratadi.

 

Maktabgacha va maktab ta’limi vazirligi, Ichki ishlar vazirligi, Mudofaa vazirligi hamda O‘zbekiston mahallalari uyushmasining 2025-yil 18-sentyabrdagi qo‘shma qarori bilan tasdiqlangan nizomga ko‘ra, o‘quvchilarning davomatini hisobga olish hozirda e-maktab platformasi orqali amalga oshiriladi. Unga muvofiq, har bir sinfda davomat fan o‘qituvchilari va sinf rahbarlari tomonidan har kuni belgilanadi.

 

Nizomga asosan, maktabda faoliyat yurituvchi inspektor-psixolog sababsiz dars qoldirayotgan o‘quvchilarning ota-onalariga yoki ularning o‘rnini bosuvchi shaxslarga rasmiy ogohlantirish yuboradi. 

 

Unda farzandning maktabga muntazam qatnashishini ta’minlash talabi qo‘yiladi hamda bu majburiyat bajarilmasa, qonunchilikka muvofiq javobgarlik kelib chiqishi mumkinligi haqida ogohlantiriladi.

 

Shuningdek, o‘quvchilarning darslarga muntazam qatnashmasligi aniqlanganda, ota-onalar yoki ularning o‘rnini bosuvchi shaxslar Ma’muriy javobgarlik to‘g‘risidagi kodeksning 47-moddasiga asosan javobgarlikka tortilishi mumkin.