Bir o‘yinda 53 ta qizil kartochka: futbol bahsi janjalga aylandi
Bungacha eng ko‘p qizil kartochkalar soni 36 ta bo‘lgan.
Braziliyada «Uberlandiya» va «Mamore» jamoalari o‘rtasidagi futbol uchrashuvi ommaviy mushtlashuv bilan yakunlandi. Hakam jami 53 kishini maydondan chetlatdi.
Voqea 1-noyabr kuni Minas-Jerays shtati U20 jamoalari o‘rtasidagi ikkinchi divizion yarim final uchrashuvida yuz berdi. Uberlandiya shahridagi «Parki-du-Sabiya» stadionida o‘tkazilgan bahsda «Mamore» raqibini 3:1 hisobida mag‘lub etdi.
Uchrashuvning qo‘shimcha daqiqalarida «Mamore» uchinchi golini urganidan so‘ng mojaro boshlangan. Mehmonlar futbolchisi Davi golni nishonlash vaqtida raqib jamoaning zaxira o‘rindig‘i tomon provokatsion harakatlar qilgan va haqoratli so‘zlar ishlatgan. Shundan keyin futbolchilar hamda murabbiylar shtabi vakillari o‘rtasida janjal kelib chiqqan.
Vaziyat qisqa vaqt ichida ommaviy mushtlashuvga aylanib, maydonda mushtlashish, tepish va turli buyumlarni uloqtirish holatlari kuzatilgan. Mojaro sabab hakam Fernando Patrik o‘yinni yakunlash protokolini ham to‘liq bajara olmagan. Shu bois qizil kartochkalar tegishli ravishda uchrashuv bayonnomasiga kiritilgan.
CNN Brasil xabariga ko‘ra, jami 53 kishi maydondan chetlatilgan. Ularning 43 nafari futbolchi, sakkiz nafari murabbiylar shtabi vakillari va ikki nafari klub rahbarlaridir. Shulardan 50 nafari ommaviy mushtlashuv ortidan, yana uch futbolchi esa uchrashuv davomida sodir etgan qoidabuzarliklari uchun jazolangan.
Mojaro faqat futbolchilar bilan cheklanmagan. Hakam bayonnomasida «Uberlandiya» rahbarlarining hakamlar brigadasiga bosim o‘tkazgani, haqorat qilgani va tahdidlar bildirgani ham qayd etilgan. Hakam Fernando Patrik klub vakillaridan biri tomonidan bildirilgan tahdidlar yuzasidan politsiyaga ariza bergan.
Ma’lumotlarga ko‘ra, ushbu holat futbol uchrashuvida maydondan chetlatilganlar soni bo‘yicha avvalgi rekorddan ham oshib ketgan. Bungacha rekord 2011-yil 27-fevral kuni Argentinaning beshinchi divizionida «Atletiko Klaypole» va «Viktoriano Arenas» jamoalari o‘rtasidagi bahsda qayd etilgan edi. O‘shanda ikki jamoaning jami 36 nafar futbolchisi qizil kartochka olgan.
