Ukraina Rossiyaning 14 ta hududiga zarba berdi: Belgorodda uch kishi halok bo‘ldi

Ukraina dronlarining Rossiyaning Belgorod viloyatiga hujumi oqibatida uch kishi halok bo‘ldi. Ayni paytda Rossiya qo‘shinlarining Ukrainaga bergan zarbalari mamlakatning bir nechta hududida elektr va suv ta’minotida uzilishlarga sabab bo‘ldi.

 

Belgorod viloyati rasmiylari 4-noyabr kuni uch kishi halok bo‘lganini ma’lum qildi. Ukraina prezidenti Volodimir Zelenskiyning bildirishicha, Rossiyaning tungi hujumlari to‘qqizta hududdagi elektr energiyasi ishlab chiqarish obyektlari va podstansiyalarga zarar yetkazgan.

 

Rossiya Mudofaa vazirligi esa Ukraina hududidagi Kiyev va Jitomir viloyatlarida joylashgan ikkita elektr stansiyasiga zarba berilganini tasdiqlagan.

 

Hujumlar oqibatida Kiyev va uning atrofidagi hududlarda elektr hamda suv ta’minoti bir necha soatga uzilgan. Poytaxtda aholiga ichimlik suvini jamoat suv olish shoxobchalaridan olish tavsiya etilgan. Shuningdek, jabrlangan hududlarda fuqarolarga issiq choy va elektron qurilmalarni quvvatlantirish imkonini beruvchi favqulodda yordam markazlari tashkil etilgan.

 

Rossiya Energetika vazirligi Ukraina hujumlari energetika infratuzilmasiga zarar yetkazganini va vaqtinchalik elektr uzilishi jadvallari joriy etilganini bildirgan.

 

Reuters xabariga ko‘ra, Rossiya qo‘shinlari Kiyevdan tashqari Poltava, Dnipro, Kirovograd va Rivne viloyatlariga ham zarba bergan.

 

Rossiya Mudofaa vazirligi 4-noyabrga o‘tar kechasi mamlakatning 14 ta hududi, Qrim yarimoroli, Qora va Azov dengizlari akvatoriyalari uzra Ukrainaning 709 ta droni urib tushirilganini bildirgan.

 

Avvalroq Ukrainaning Rossiya janubidagi Adigeysk shahriga dronlar orqali hujumi oqibatida Ozon kompaniyasining logistika markazida yong‘in chiqqani haqida xabar berilgan edi. Kompaniya barcha xodimlar evakuatsiya qilinganini, hech kim jabrlanmaganini ma’lum qilgan. Shikastlangan mahsulotlar sotuvdan olib tashlangan, buyurtmalarni yetkazib berish esa boshqa obyektlarga yo‘naltirilgan.