Farg‘onada xalqaro darajadagi yagona IT markaz: AQSh va O‘zbekiston diplomini olish imkoniyati
Yangi tashkil etilayotgan dasturchilarni tayyorlash markazida ta’lim to‘liq grant asosida olib boriladi. Qabul jarayoni uch bosqichdan iborat bo‘ladi.
O‘zbekiston Jurnalistlar uyushmasi, Kontent tayyorlash markazi va Farg‘ona viloyati hokimligi hamkorligida “Farg‘onada yangi O‘zbekiston nafasi” shiori ostida jurnalistlar uchun press-tur tashkil qilindi. Press-tur doirasida viloyatda xalqaro darajadagi yagona IT markaz faoliyati bilan ham tanishildi.
Farg‘ona viloyatida axborot texnologiyalari sohasini rivojlantirish bo‘yicha keng ko‘lamli islohotlar amalga oshirilmoqda. Hududni IT-hub'ga aylantirish yo‘lida yangi ta’lim loyihalari, xalqaro hamkorliklar va innovatsion infratuzilmalar bosqichma-bosqich joriy etilmoqda.
Yangi tashkil etilayotgan dasturchilarni tayyorlash markazida ta’lim to‘liq grant asosida olib boriladi. Qabul jarayoni ikki bosqichdan iborat bo‘lib, dastlabki bosqich — Foundation darajasi suhbat asosida amalga oshiriladi. Bu bosqichda yoshlarning bazaviy bilimlari emas, balki ularning motivatsiyasi va o‘rganishga tayyorligi asosiy mezon sifatida baholanadi.
Ikkinchi bosqichga esa faqat o‘zini ko‘rsatgan, jamoada ishlay oladigan, yetarli soft skillarga ega bo‘lgan talabalar saralab olinadi. Aynan shu bosqichda chuqurlashtirilgan dasturlash ta’limi boshlanadi. Rejaga ko‘ra, har yili 320 nafargacha yuqori malakali dasturchilar tayyorlanadi.
Uchinchi bosqichda ularga o‘z ish joylariga ega bo‘lishi uchun olti oygacha turli xil bilim-ko‘nikmalar beriladi. Xususan, qanday qilib ish suhbatlaridan o‘tish va shu bilan bir qatorda qanday qilib startap kompaniyalarga asos solish, o‘zlarining xizmatlarini qanday qilib turli xil frilans platformalarda sota olish bo‘yicha ham ularga bilim-ko‘nikmalar berib boriladi.
Mazkur markaz Apple kompaniyasining rasmiy filiali bo‘lmasa-da, uning standartlari asosida faoliyat yuritadi. Ta’lim dasturlarini amalga oshirish uchun kompaniya litsenziyasi olingan bo‘lib, o‘qituvchilar ham maxsus treninglardan o‘tadi. Bu esa bitiruvchilarning xalqaro darajada raqobatbardosh bo‘lishini ta’minlaydi.
Shuningdek, Farg‘onada tashkil etilayotgan Apple Developer Center yiliga 350 nafargacha yoshlarni qamrab olib, ular tomonidan ishlab chiqilgan mahsulotlarni global bozorlarga olib chiqish imkonini yaratadi.
IT Park Uzbekistan Farg‘ona filiali oldiga katta maqsadlar qo‘ygan. Xususan 2026-yilga borib rezidentlar sonini 1000 nafarga, xodimlar sonini esa 3000 nafarga yetkazish rejalashtirilgan.
Shu bilan birga So‘nggi yillarda eksport ko‘rsatkichlari ham sezilarli oshgan:
- 2024-yil: 6 mln dollar
- 2025-yil: 12,7 mln dollar
- 2026-yil reja: 25 mln dollar
Bundan tashqari, AQSh, Yaponiya va qo‘shni davlatlarda filiallar ochilishi rejalashtirilmoqda, bu esa Farg‘ona yoshlari uchun xalqaro bozorga chiqish imkonini kengaytiradi.
Shuningdek Farg‘onada ikki muhim oliy ta’lim loyihasi yo‘lga qo‘yilmoqda:
- Inha University Farg‘ona filiali
- IT Park University
Mazkur universitetlarda ta’lim ingliz tilida olib boriladi va dual (gibrid) model asosida tashkil etiladi. Talabalar o‘qish jarayonida amaliy loyihalarda qatnashadi va ikkinchi kursdan boshlab real kompaniyalar bilan ishlash imkoniga ega bo‘ladi.
Xususan, EPAM Systems bilan hamkorlikda talabalar uch yil davomida real loyihalarda ishlaydi va bitiruvchilarning deyarli barchasi ish bilan ta’minlanadi.
Eng quvonarlisi Ta’lim dasturlari Arizona State University bilan hamkorlikda ishlab chiqilgan bo‘lib, talabalar ikki diplom — O‘zbekiston va AQSh diplomiga ega bo‘lishadi.
