Shimoliy Koreya konstitutsiyasidan Janubiy Koreya bilan birlashish haqidagi normalar olib tashlandi
Konstitutsiyaga o‘zgartirishlar kiritib, hujjatda Janubiy Koreya “dushman davlat” sifatida qayd etildi.
Shimoliy Koreya (KXDR) o‘z konstitutsiyasiga muhim o‘zgartirishlar kiritdi. Yangilangan Asosiy qonundan Janubiy Koreya bilan birlashish haqidagi barcha normalar chiqarib tashlandi. Bu haqda Reuters xabar berdi.
Yangi tahrirga ko‘ra, mamlakat hududi endi shimolda Xitoy va Rossiya, janubda esa Koreya bilan chegaradosh sifatida belgilangan. Shu bilan birga, Janubiy Koreya hujjatda alohida “dushman davlat” sifatida qayd etilgan.
Ma’lumotlarga ko‘ra, mazkur o‘zgartirishlar KXDR Oliy Xalq Assambleyasi tomonidan mart oyida qabul qilingan. Bu haqda Seuldagi ekspertlar tomonidan rasman ma’lum qilingan.
Yangilangan konstitutsiyada davlat rahbari maqomi ham qayta belgilangan. Kim Chen In endilikda Davlat ishlari bo‘yicha komissiya raisi va rasmiy davlat rahbari sifatida ko‘rsatilgan. Avval u “oliy rahbar” sifatida tilga olinardi.
Hujjatda KXDR yadroviy qurolga ega davlat sifatida yana bir bor tasdiqlanib, yadroviy kuchlar ustidan to‘liq boshqaruv vakolati davlat rahbariga yuklatilgani belgilangan. Shuningdek, mamlakat o‘zini “global tinchlikni ta’minlash uchun harakat qiluvchi mas’uliyatli yadroviy davlat” sifatida ta’riflagan.
Mazkur konstitutsiyaviy o‘zgarishlar Koreya yarim orolini qayta birlashtirish g‘oyasidan rasmiy voz kechilganini anglatadi.
