Karkidon turizm majmuasi: tabiat va zamonaviylik uyg‘unlashgan maskan

O‘zbekiston Jurnalistlar uyushmasi, Kontent tayyorlash markazi va Farg‘ona viloyati hokimligi hamkorligida jurnalistlar uchun “Farg‘onada yangi O‘zbekiston nafasi” shiori ostida press-tur tashkil qilindi. Press-tur davomida Karkidon suv omboriga borildi.

 

Karkidon suv ombori hududi yaqin yillarda Farg‘ona vodiysining eng yirik va zamonaviy ekoturizm maskanlaridan biriga aylanishi kutilmoqda. Davlat rahbarining 2025-yil 1-apreldagi qaroriga muvofiq, bu yerda qiymati 635 milliard so‘mlik zamonaviy turizm majmuasi shakllantirilmoqda.

 

 

508 gektar maydonni qamrab olgan loyiha doirasida agroturizm, ekoturizm va ekstremal turizm yo‘nalishlari birlashtirilgan bo‘lib, hududda keng ko‘lamli obodonlashtirish ishlari olib borilmoqda. Majmua uchun ishlab chiqilgan master-rejaga asosan, dastlabki bosqichda 250 gektar maydon o‘zlashtirilgan. Suv ombori atrofiga 110 mingdan ortiq manzarali daraxt va ko‘chatlar ekilib, 13 ta tik quduq qazilgan hamda tomchilatib sug‘orish tizimi yo‘lga qo‘yilgan.

 

Majmuaga kirish qismida 30 gektar maydonda barpo etilgan lavandazor sayyohlar e’tiborini tortadi. Hududda mehmonlar uchun 25 ta zamonaviy shale uylari qurilgan bo‘lib, ular oilaviy va guruh tarzida dam olish uchun mo‘ljallangan.

 

Kompleksning markaziy qismida 48 gektarlik “Sokin hudud” tashkil etilgan. Ushbu hududda sun’iy ko‘l, sayr qilish uchun 6 kilometrdan ortiq piyodalar yo‘lagi hamda uzunligi 420 metr bo‘lgan zamonaviy ko‘prik qurilgan. Bundan tashqari, bolalar maydonchalari, workout zonalari va shaxmat maydonlari ham tashkil etilgan.

 

Hududdagi eng yirik loyihalardan biri — 12 gektar maydondagi gullar bog‘i hisoblanadi. Mazkur loyiha Dubai Miracle Garden'dan ilhomlangan holda ishlab chiqilgan bo‘lib, hajmi jihatidan undan ikki baravar katta bo‘lishi rejalashtirilgan. Hozirda bog‘ hududida betonlashtirish va piyodalar yo‘laklari qurilishi yakunlanib, obyektlarni joylashtirish ishlari davom etmoqda.

 

Majmuada gastronomik hudud ham tashkil etilib, unda milliy va xorijiy taomlar taklif qiluvchi 12 ta kafe va restoran faoliyat yuritadi. Shuningdek, loyiha doirasida 45 ta shale, 57 ta zamonaviy mehmon uyi, ekobozor va agroturizm maskanlari barpo etilgan.

 

Kelgusida hududda motokross maydonlari, 2 kilometrlik dor yo‘li, karting hamda golf maydonlarini qurish rejalashtirilgan. Bu esa Karkidon suv omborini faol turizm yo‘nalishidagi yetakchi maskanlardan biriga aylantirishi kutilmoqda.

 

Loyiha doirasida 100 dan ortiq tadbirkorlik subyekti tashkil etilib, qariyb 2 mingta yangi ish o‘rni yaratiladi. Majmua yiliga 750 ming nafar sayyohni qabul qilishi, 3 milliard so‘mlik byudjet tushumi hamda 5 million dollarlik xizmatlar eksportini ta’minlashi rejalashtirilgan. Kompleks 2027 yildan boshlab to‘liq quvvatda ishga tushiriladi.