Vengriya Ukrainaning musodara qilingan pul va oltinlarini qaytaradi

Vengriya hukumati mart oyida Budapeshtda musodara qilingan Ukraina davlat banki — “Oshadbank”ga tegishli pul mablag‘lari va oltinlarni Kiyevga qaytardi. Bu haqda Ukraina prezidenti Volodimir Zelenskiyga tayanib, DW ma’lum qildi.

 

Uning so‘zlariga ko‘ra, mablag‘larning qaytarilishi ikki davlat o‘rtasidagi munosabatlarda “muhim qadam” bo‘lgan. Zelenskiy Vengriyaning yangi hukumatiga “konstruktiv va sivilizatsiyalashgan yondashuv” uchun minnatdorlik bildirgan.

 

Gap 5-mart kuni Vengriyada ushlab qolingan ikki inkassator avtomobili haqida bormoqda. Ularda 40 million dollar, 35 million yevro hamda 9 kilogramm oltin bo‘lgani aytilgan. Vengriya tomoni ushbu holat yuzasidan pul yuvish gumoni bilan jinoyat ishi qo‘zg‘atgan edi.

 

Rasmiy Budapesht ma’lumotiga ko‘ra, mablag‘ va qimmatbaho metallarning tashilishi Ukraina Xavfsizlik xizmati sobiq generali hamda harbiy tajribaga ega boshqa shaxslar rahbarligida amalga oshirilgan bo‘lishi mumkin.

 

“Oshadbank” esa mablag‘lar Avstriyaning Raiffeisen Bank International bilan tuzilgan xalqaro kelishuv doirasida tashilayotganini bildirgan. Ukraina tomoni inkassatorlarni ozod qilish va musodara qilingan aktivlarni qaytarishni talab qilgan.

 

Oradan bir kun o‘tib, qo‘lga olingan yetti nafar inkassator Ukrainaga qaytarilgan. Biroq Vengriya hukumati dastlab inkassator avtomobillarini qaytarishga tayyorligini, ammo pul va oltin topshirilmasligini bildirgan edi.

 

Aprel oyida Vengriyadagi parlament saylovlaridan so‘ng Zelenskiy ushbu masala Vengriyaning “Tisa” partiyasi rahbari Peter Madyar bilan muhokama qilinayotganini ma’lum qilgan. Mazkur siyosiy kuch parlament saylovlarida eng ko‘p mandatni qo‘lga kiritgan. Mamlakatda 16 yil bosh vazirlik qilgan Viktor Orban esa mag'lubiyatga uchragan.