“Biz harakat qildik, ammo hozircha samarali natijaga erishilmadi” — Marko Rubio
AQSh Davlat kotibi Ukraina bo‘yicha muzokaralar boshi berk ko‘chaga kirganini ma’lum qildi.
Marko Rubio Ukraina bo‘yicha olib borilgan muzokaralar hozircha boshi berk ko‘chaga kirib qolganini ma’lum qildi. Bu haqda The Moscow Times xabar berdi.
Rubioning aytishicha, AQSh tomonlar o‘rtasida vositachilik qilishga harakat qilgan, biroq bir qator omillar sabab muzokaralar kutilgan natijani bermagan.
“Biz vositachilik qilishga urindik, ammo hozircha samarali natijaga erishilmadi. Agar imkoniyat paydo bo‘lsa, AQSh bu rolni bajarishga tayyor”, dedi u.
Davlat kotibi, shuningdek, Vashington taraqqiyotga olib kelmaydigan muzokaralarga ortiqcha vaqt va resurs sarflashni istamasligini ta’kidladi. Uning qayd etishicha, vaziyat o‘zgarsa, Donald Tramp ma’muriyati muzokara jarayoniga qaytishga tayyor.
Xabarlarga ko‘ra, AQSh tomonidan Vladimir Putin ma’muriyatiga sanksiyalarni yumshatish, iqtisodiy hamkorlikni kengaytirish va ayrim hududiy masalalarni muhokama qilishni o‘z ichiga olgan takliflar berilgan. Biroq Moskva Donbass hududi bo‘yicha o‘z talablarini saqlab qolayotgani aytilmoqda.
Shuningdek, Bloomberg manbalariga ko‘ra, Rossiya rahbariyati urushni yana bir necha yil davom ettirish ehtimolini ko‘rib chiqmoqda hamda yangi harbiy operatsiyalar uchun tayyorgarlik olib bormoqda.
Avvalroq AQSh Ukraina bo‘yicha tinchlik kelishuviga erishish va keyinchalik uni referendum hamda saylovlar orqali mustahkamlash imkoniyatlarini muhokama qilayotgani haqida xabarlar tarqalgan edi.
