AQShdagi “Alligator Alcatraz” qamoqxonasi yopilishi mumkin
Markaz hukumatga kuniga 1 million dollardan ortiq xarajat keltirayotgani qayd etildi.
AQSh ma’muriyati Florida shtatida joylashgan “Alligator Alcatraz” nomli migratsiya hibsxonasini yopish masalasini ko‘rib chiqmoqda. Bu haqda Florida gubernatori Ron DeSantis ma’lum qildi deydi TASS.
Uning ta’kidlashicha, muassasa faoliyatini yakunlash bo‘yicha masala hozirda muhokama bosqichida bo‘lib, yangi Ichki xavfsizlik departamenti rahbari ham vaziyatni qayta ko‘rib chiqmoqda.
Dastlab noqonuniy immigratsiyaga qarshi kurash modeli sifatida taqdim etilgan ushbu markaz keyinchalik yuqori xarajatlar va samaradorlikka oid savollar sababli tanqid ostida qolgan. Ma’lumotlarga ko‘ra, uning ishlashi kuniga 1 million dollardan ortiq mablag‘ talab etadi.
“New York Times” nashri xabariga ko‘ra, muzokaralar dastlabki bosqichda bo‘lib, muassasaning iqtisodiy jihatdan samarasiz ekani qayd etilgan.
“Alligator Alcatraz” 2025-yil yozida ochilgan bo‘lib, u alligatorlar va zaharli ilonlar yashaydigan botqoqlik hududida joylashganligi bilan ham e’tiborni tortgan. Dastlab u kelgusidagi shunga o‘xshash markazlar uchun namuna sifatida ko‘rilgan edi.
