Pokistonda xudkushlik hujumi oqibatida 15 nafar politsiyachi halok bo‘ldi
Terrorchilar portlovchi moddalar ortilgan avtomobil bilan politsiya postiga hujum uyushtirgan.
Pokistonning shimoli-g‘arbiy qismida joylashgan Xayber Paxtunxva viloyatida sodir etilgan xudkushlik hujumi oqibatida kamida 15 nafar politsiya xodimi halok bo‘ldi. Bu haqda Dawn nashri mahalliy rasmiylarga tayanib xabar berdi.
Ma’lum qilinishicha, terrorchilar Bannu tumanidagi politsiya postiga portlovchi moddalar bilan to‘ldirilgan avtomobil yordamida hujum uyushtirgan. Kuchli portlashdan so‘ng hujumchilar bir necha yo‘nalishdan o‘q uzgan.
Hududiy politsiya vakili Sajjad Xonning ma’lum qilishicha, hujum vaqtida postda jami 18 nafar politsiya xodimi navbatchilik qilayotgan bo‘lgan.
Portlash oqibatida politsiya posti deyarli butunlay vayron bo‘lgan. Shuningdek, post hududidagi zirhli texnika yo‘q qilingan va yaqin atrofdagi binolar ham jiddiy zarar ko‘rgan.
Rasmiylar qutqaruv ishlari yakunlanganini bildirgan. Hozirda hududda xavfsizlik choralari kuchaytirilib, qo‘shimcha nazorat punktlari tashkil etilgan.
