Suriya Prezidenti akalarini yuqori lavozimlardan bo‘shatdi
Lekin ulardan biri Rossiyaga elchi etib tayinlanishi mumkin.
Suriya prezidenti Ahmad ash-Shara’a hukumatdagi kadrlar almashinuvi doirasida ikki akasi — Maher va Hazem ash-Shara'ani yuqori lavozimlardan chetlatdi. Bu haqda prezidentga yaqin manbaga tayanib i24NEWS xabar berdi.
Manbaga ko‘ra, mazkur o‘zgarishlar hukumat faoliyatini yangilash va suriyaliklar ishonchini qayta tiklashga qaratilgan siyosiy o‘zgarish doirasida amalga oshirilgan.
Maher ash-Shara’a shu paytgacha Suriya prezidenti administratsiyasi bosh kotibi lavozimida ishlab kelgan. Endilikda uning o‘rnini Homs viloyatining sobiq gubernatori Abdulrahmon al-Aama egallagan.
Xabarda aytilishicha, Maher ash-Shara’a Damashq va Moskva o‘rtasidagi aloqalarda muhim figuraga aylangan. Bunga uning rus tilini bilishi va rafiqasi rossiyalik ekani sabab bo‘lgani qayd etilgan.
Prezidentga yaqin manba Maher ash-Shara’aning Rossiyaga elchi etib tayinlanishi ehtimoli yuqori ekanini bildirgan.
Prezidentning yana bir akasi Hazem ash-Shara’a ham lavozimini tark etgan. U Iqtisodiy taraqqiyot bo‘yicha oliy kengash vitse-prezidenti sifatida faoliyat yuritgan.
Ma’lumotlarga ko‘ra, aka-ukalarning lavozimdan olinishi avvaldan muhokama qilinayotgan edi. O‘tgan oy ularning otasi, iqtisodiy sharhlovchi Husayn ash-Shara’a Maher va Hazem davlatdagi faoliyatini “toza qo‘llar va yaxshi obro‘ bilan” yakunlashini ta’kidlagan.
i24NEWS'ning yozishicha, kadrlar almashinuvi Suriyada hokimiyat tizimini qayta shakllantirish va ichki ishonchni mustahkamlashga qaratilgan kengroq jarayonning bir qismi sifatida ko‘rilmoqda.
