Ukraina prezidenti ofisining sobiq rahbari pul yuvishda ayblanmoqda
Andrey Yermak elita turar joy loyihasi orqali 10 million dollardan ortiq mablag‘ni legallashtirishda gumon qilinmoqda.
Ukraina hukumati prezident Volodimir Zelenskiyning sobiq apparat rahbari Andrey Yermakni yirik korrupsiya va pul yuvish ishi bo‘yicha gumonlanuvchi sifatida e’lon qildi, deya xabar bermoqda Reuters.
Ukrainaning korrupsiyaga qarshi kurashuvchi idoralari ma’lumotiga ko‘ra, Yermak Kiyev yaqinidagi elita turarjoy majmuasi orqali taxminan 10,5 million dollar mablag‘ni legallashtirish bilan bog‘liq jinoiy sxemada ishtirok etganlikda gumon qilinmoqda.
Qonunchilik talablariga muvofiq rasmiy bayonotda gumonlanuvchi nomi ochiqlanmagan. Biroq mahalliy OAVlar gap aynan Yermak haqida ketayotganini yozdi.
Yermak Ozodlik Radiosiga bergan izohida mazkur turarjoy majmuasida ko‘chmas mulkka egalik qilmasligini bildirgan, biroq boshqa tafsilotlarga izoh bermagan.
Mazkur ish o‘tgan yil noyabrida boshlangan keng ko‘lamli korrupsiya tergovining bir qismi hisoblanadi. O‘shanda Zelenskiyning sobiq biznes hamkori davlat atom agentligida 100 million dollarlik “otkat” sxemasini tashkil etganlikda ayblangandi.
Tergov doirasida Ukrainaning sobiq bosh vazir o‘rinbosari ham ayblovga tortilgan.
Prezidentning kommunikatsiyalar bo‘yicha maslahatchisi Dmitro Litvinning aytishicha, Yermakka nisbatan bildirilgan gumon bo‘yicha protsessual harakatlar hali davom etmoqda va hozircha yakuniy xulosa chiqarishga erta.
Siyosiy doiralarda Yermak uzoq vaqt davomida Zelenskiydan keyingi eng ta’sirli shaxslardan biri sifatida ko‘rilgan. Sobiq kino prodyuseri va yurist bo‘lgan Yermak AQSH vositachiligidagi Rossiya-Ukraina muzokaralarida ham Kiyevning bosh muzokarachilaridan biri edi.
U 2025-yilda prezident administratsiyasiga nisbatan ishonchni tiklash maqsadida amalga oshirilgan hukumatdagi o‘zgarishlar fonida lavozimini tark etgan edi.
