Rossiyada o‘zbekistonlik va bangladeshlik migrantlar ishtirokida ommaviy mushtlashuv yuz berdi
Mojaroda 60 ga yaqin ishchi qatnashgan, 20 kishi shifoxonaga yotqizilgan.
Rossiyaning Leningrad viloyatida joylashgan Sinyavinskaya parrandachilik fermasida O‘zbekiston va Bangladesh fuqarolari o‘rtasida ommaviy mojaro yuz berdi. Bu haqda Gazeta.ru nashri xabar berdi.
Mahalliy huquqni muhofaza qiluvchi organlar ma’lumotiga ko‘ra, hodisa Kirov tumani hududidagi Priladojskiy qishlog‘ida joylashgan korxonada sodir bo‘lgan. Dastlab ishchilar o‘rtasida og‘zaki tortishuv kelib chiqqan, keyinchalik esa mojaro ommaviy mushtlashuvga aylangan.
Ma’lumotlarga ko‘ra, janjalda qariyb 60 nafar migrant ishtirok etgan. Hodisa joyiga politsiya, Rosgvardiya va tez tibbiy yordam brigadalari jalb qilingan.
Mushtlashuv oqibatida 20 kishi turli darajadagi tan jarohatlari bilan shifoxonaga yotqizilgan. Ulardan yetti nafari og‘ir ahvolda ekani aytilmoqda.
Rossiya Ichki ishlar vazirligi hodisa yuzasidan tekshiruv ishlari olib borayotganini ma’lum qildi. Hozirda 21 yoshdan 39 yoshgacha bo‘lgan 12 nafar xorijlik bilan tergov harakatlari olib borilmoqda. Dastlabki ma’lumotlarga ko‘ra, aynan ular janjalning eng faol ishtirokchilari bo‘lgan.
Dastlabki ma’lumotlarga ko‘ra, mojaro Bangladesh fuqarosi Markaziy Osiyodan bo‘lgan hamkasbini o‘pganidan keyin boshlangan. Bu holatni o‘zbekistonlik ishchining otasi ko‘rib qolgan va shundan so‘ng ziddiyat kuchaygan. Ish smenasidan keyin kelishmovchilik parrandachilik fabrikasi hududidagi yotoqxonada davom etgan.
Shuningdek, hodisa davomida tayoq, tosh va boshqa qo‘lbola buyumlardan foydalanilgani qayd etilgan.
Ayni paytda hodisaning barcha tafsilotlari o‘rganilmoqda. Hozircha jinoiy ish qo‘zg‘atilgani haqida rasmiy ma’lumot berilmagan.
