Rossiyada qurilishdagi baxtsiz hodisada o‘zbekistonlik ishchi halok bo‘ldi
Minorali kran iskala konstruksiyasiga zarar yetkazganidan so‘ng ikki o‘zbekistonlik ishchi 7-qavatdan yiqilib tushib biri halok boʻlgan, yana biri ogʻir tan jarohatlari olgan.
Buryatiya Respublikasida qurilish maydonchasida sodir boʻlgan baxtsiz hodisa oqibatida Oʻzbekiston fuqarolaridan biri halok boʻldi, yana biri ogʻir tan jarohatlari oldi.
Oʻzbekistonning Novosibirsk shahridagi Bosh konsulligi maʼlumotiga koʻra, hodisa Joriy yilning 8-may kuni Ulan-Ude shahrida qurilayotgan koʻp qavatli turar-joy binosida yuz bergan.
Dastlabki maʼlumotlarga koʻra, minorali kran operatori ehtiyotsizlik oqibatida iskala konstruksiyasiga zarar yetkazgan. Natijada xavfsizlik kamarlarisiz ishlayotgan Oʻzbekistonning ikki nafar fuqarosi binoning 7-qavatidan yiqilib tushgan.
Jabrlanuvchilardan biri ogʻir jarohatlar bilan shifoxonaga yotqizilgan. Ikkinchi fuqaro esa olgan tan jarohatlari oqibatida voqea joyida vafot etgan.
Mazkur holat yuzasidan Buryatiya huquqni muhofaza qiluvchi organlari tomonidan Rossiya Federatsiyasi Jinoyat kodeksining 217-moddasi 2-qismi bilan jinoyat ishi qoʻzgʻatilgan.
Maʼlum qilinishicha, Oʻzbekistonning Novosibirskdagi Bosh konsulligi Migratsiya agentligining hududiy vakolatxonasi bilan hamkorlikda marhumning jasadini vatanga yuborish choralarini koʻrmoqda.
