Angrenda ikki kishi ziplaynda to‘qnashib ketdi
Mazkur attraksion tegishli davlat idoralarining ruxsatiga ega bo‘lmagan.
Ijtimoiy tarmoqlarda Toshkent viloyati Angren shahridagi tog‘li hududda ziplaynda ikki fuqaroning to‘qnashuvi aks etgan video tarqaldi. Hodisa yuzasidan Favqulodda vaziyatlar vazirligi ma’lumot berdi.
Qayd etilishicha, trosli tushish moslamasidan foydalangan fuqarolar to‘qnashuv oqibatida tan jarohati olmagan.
Tekshiruv davomida mazkur attraksion tegishli davlat idoralarining ruxsat beruvchi hujjatlarisiz noqonuniy faoliyat yuritib kelgani aniqlangan.
Hodisa joyiga Favqulodda vaziyatlar vazirligi xodimlari hamda boshqa mas’ul idoralar vakillari yetib borgan. Ishchi guruh xulosasiga ko‘ra, ziplayn attraksioni demontaj qilinib, uning faoliyatini tashkil etgan fuqarolarga nisbatan jarima qo‘llangan.
FVV fuqarolarni tegishli davlat organlaridan rasmiy ruxsat olmagan attraksionlardan foydalanmaslikka chaqirdi.
