Rossiyada 200 dan ortiq o‘zbekistonlikni noqonuniy qonuniylashtirgan guruh fosh etildi
Noqonuniy sxemaga 45 yoshli O‘zbekiston fuqarosi rahbarlik qilgan.
Rossiyaning Voronej viloyatida O‘zbekiston fuqarolarining noqonuniy migratsiyasini tashkil etish bilan shug‘ullangan jinoiy guruh faoliyatiga chek qo‘yildi. Bu haqda Rossiya Ichki ishlar vazirligining Voronej viloyati bo‘yicha bosh boshqarmasi ma’lum qildi.
Dastlabki ma’lumotlarga ko‘ra, noqonuniy sxemaga 45 yoshli O‘zbekiston fuqarosi rahbarlik qilgan. U uch nafar mahalliy aholini — 56 yoshli ayol, 44 yoshli erkak hamda 73 yoshli nafaqaxo‘rni ushbu faoliyatga jalb qilgan.
Tergov ma’lumotlariga ko‘ra, guruh 2024-yil iyun oyidan buyon faoliyat yuritib kelgan. Ular pul evaziga O‘zbekistondan kelgan migrantlar uchun soxta ro‘yxatdan o‘tkazish hujjatlari, shuningdek, rus tili, Rossiya tarixi va qonunchiligi bo‘yicha imtihonlardan o‘tgani haqidagi qalbaki sertifikatlarni tayyorlab bergan.
Huquq-tartibot organlari ma’lumotiga ko‘ra, ushbu sxema orqali 200 dan ortiq O‘zbekiston fuqarosi Rossiyada noqonuniy ravishda qonuniylashtirilgan.
Tintuvlar davomida kompyuter texnikalari, planshet va noutbuklar, mobil telefonlar, bank kartalari, tijorat muhrlari, migrantlarga tegishli pasportlar hamda mingdan ortiq migratsion hujjatlar nusxalari musodara qilingan.
Mazkur holat yuzasidan Rossiya Jinoyat kodeksining noqonuniy migratsiyani tashkil etish bilan bog‘liq moddasi asosida jinoyat ishi qo‘zg‘atilgan. Guruh rahbari hibsga olingan, qolgan gumonlanuvchilarga nisbatan ehtiyot chorasi qo‘llangan.
Hozirda tergov harakatlari davom ettirilmoqda.
