Samarqandda uchta yuk avtomobili ishtirokida YTH sodir bo‘ldi
Hodisaga haydovchining rulda uxlab qolishi sabab bo‘lgan.
Samarqand viloyati Paxtachi tumanida yuk avtomobillari ishtirokida yo‘l-transport hodisasi sodir bo‘ldi. Viloyat YHXB ma’lumotiga ko‘ra, hodisa 16-may kuni soat 04:30 larda M-37 “Samarqand–Buxoro–Turkmanboshi” avtomobil yo‘lining 118-kilometrida yuz bergan.
Dastlabki ma’lumotlarga ko‘ra, “FAV” rusumli yuk avtomobili haydovchisi Samarqand–Navoiy yo‘nalishida harakatlanayotib uxlab qolgan va rul boshqaruvini yo‘qotgan. Natijada avtomobil yo‘l chetida to‘xtab turgan “SINOTRUK HOWO” yuk mashinasining chap yon qismiga urilgan.
Shundan so‘ng transport vositasi harakatni to‘xtata olmasdan, oldinda to‘xtab turgan yana bir “SINOTRUK HOWO” rusumli yuk avtomobilining orqa qismiga kelib urilgan.
Hodisa oqibatida “FAV” hamda “SINOTRUK HOWO” rusumli yuk transport vositalarida yong‘in yuzaga kelgan. Yong‘in Favqulodda vaziyatlar vazirligi xodimlari tomonidan tezkor ravishda bartaraf etilgan.
Ma’lum qilinishicha, yo‘l-transport hodisasi oqibatida tan jarohati olganlar va halok bo‘lganlar yo‘q.
Mazkur holat yuzasidan Paxtachi tumani IIB JXX YHXG tomonidan dastlabki surishtiruv ishlari olib borilmoqda.
