Sergeli avtomobil bozorida “aqlli” nazorat tizimi joriy etilmoqda

Toshkentdagi Sergeli avtobozorida savdo jarayonlarini tartibga solish, raqamlashtirish hamda xizmat ko‘rsatish sifatini oshirishga qaratilgan ishlar amalga oshirilmoqda, deya xabar bermoqda Bojxona qo‘mitasi.

 

Ma’lum qilinishicha, bozor hududida zamonaviy “Situatsion markaz” tashkil etilgan. Ushbu markaz orqali hududga kirib-chiqayotgan avtotransport vositalari harakati, savdo jarayonlari, avtoturargohlar bandligi va xavfsizlik holatini onlayn monitoring qilish imkoniyati yaratiladi.

 

Shuningdek, “aqlli kameralar”ni o‘rnatish va kabel tarmoqlarini tortish ishlari bosqichma-bosqich davom ettirilmoqda. Tizim orqali bozorga kiruvchi transport vositalari hisobi yuritilishi, davlat raqam belgilari aniqlanishi hamda avtomobillarning savdo maydonlariga joylashuvi nazorat qilinishi rejalashtirilgan.

 

Bozor hududi boshqaruv va raqamlashtirish tizimini yo‘lga qo‘yish maqsadida 9 ta funksional blokka ajratilgan. Ayrim hududlar avtomobil savdosi, vaqtinchalik va doimiy avtoturargoh sifatida qayta tashkil etilgan. Ma’muriy binolar hamda ehtiyot qismlar savdosi uchun ham alohida maydonlar belgilangan.

 

Bundan tashqari, infratuzilmani tartibga keltirish doirasida omborxona va avtoservislarni qayta tashkil etish rejalashtirilgan. Hududdagi tartibsiz joylashgan konteynerlar xatlovdan o‘tkazilib, 100 dan ortig‘i qayta joylashtirilgan.

 

Bozorga kirish uchun qo‘shimcha yondosh yo‘l loyihasi ishlab chiqilgani, hududda asfaltlash ishlari olib borilayotgani va avtomobillar uchun yangi joylar tashkil etilayotgani aytilmoqda.

 

Shu bilan birga, bozor hududidagi savdo do‘konlari, xizmat ko‘rsatish shoxobchalari va boshqa inshootlar soliq hamda kadastr mutaxassislari ishtirokida qayta xatlovdan o‘tkazilmoqda.

 

Fuqarolar uchun qulaylik yaratish maqsadida avtomobillarni oldindan joylashtirish imkonini beruvchi “Click Avto” mobil ilovasi ham ishlab chiqilgani ma’lum qilindi.