Tramp “dunyodagi eng faol terrorchilardan biri” yo'q qilinganini e'lon qildi
IShID yetakchisi Abu Bilol al-Maynuqiy AQSh va Nigeriya harbiylari o'rtasida qo'shma operatsiya natijasida yo'q qilingan.
AQSh prezidenti Donald Tramp Afrikada faoliyat yuritgan IShID yetakchilaridan biri Abu Bilol al-Maynuqiy yo‘q qilinganini ma’lum qildi. U bu haqda o‘zining Truth Social ijtimoiy tarmog‘idagi sahifasida yozgan.
Trampning bayonotiga ko‘ra, AQSh va Nigeriya qurolli kuchlari hamkorligida o‘tkazilgan maxsus va puxta rejalashtirilgan operatsiya davomida “dunyodagi eng faol terrorchilardan biri” jang maydonidan chiqarib tashlangan.
AQSh prezidenti ushbu operatsiya oldindan aniq razvedka ma’lumotlari asosida amalga oshirilganini qayd etib, Amerika tomoniga Afrikadagi terroristik guruhlar faoliyati bo‘yicha doimiy ma’lumot yetkazib borilganini ta’kidlagan.
Uning so‘zlariga ko‘ra, al-Maynuqiy yo‘q qilingach, IShIDning Afrikadagi faoliyatida sezilarli zaiflashuv kuzatilgan.
Shuningdek, Donald Tramp Nigeriya hukumati va qurolli kuchlariga ushbu operatsiyani amalga oshirishdagi hamkorlik uchun minnatdorlik bildirgan.
