AQSHda ikkita qiruvchi samolyot havoda to‘qnashib ketdi
To'rt nafar ekipaj a'zosi parashyutlardan foydalanib samolyotni tark etgan.
Aydaho shtatida o‘tkazilgan aviashou vaqtida AQSHning ikki qiruvchi samolyoti havoda to‘qnashib ketdi. Hodisa Mountain Home Air Force Base hududida tashkil etilgan “Gunfighter Skies” aviako‘rgazmasining ikkinchi kuni davomida sodir bo‘lgan.
Times Now News xabariga ko‘ra, hodisada Boeing F/A-18E/F Super Hornet hamda Boeing EA-18G Growler samolyotlari ishtirok etgan.
Ma'lum qilinishicha qiruvchi samolyotlardan biri murakkab manyovrni amalga oshirish jarayonida ikkinchi samolyotga tegib ketgan. To‘qnashuvdan so‘ng uchuvchilar katapultadan foydalanib, samolyotni tark etgan.
Guvohlarning aytishicha, hodisadan keyin osmondan to‘rtta parashyut tushayotgani kuzatilgan.
Shundan so‘ng samolyotlardan biri yerga qulab tushib, portlagan. Harbiy baza ma’muriyati hodisani tasdiqlab, hudud vaqtincha yopilgani va holat yuzasidan tergov harakatlari boshlanganini ma’lum qilgan.
