Farg‘onada o'smir bolalardan iborat jinoiy guruh qo‘lga olindi

 

Farg‘ona viloyatida maktab o‘quvchilari va fuqarolarni qo‘rqitib kelgan uyushgan jinoiy guruh faoliyatiga chek qo‘yildi. Bu haqda Farg‘ona viloyati Ichki ishlar boshqarmasi ma'lum qildi.

 

Qayd etilishicha, jinoiy guruh tarkibida 15, 18 va 20 yoshli shaxslar bo‘lgan. Dastlabki ma’lumotlarga ko‘ra, muqaddam Jinoyat kodeksining 97-moddasi — qasddan odam o‘ldirish jinoyati bilan sudlangan, 2004-yilda tug‘ilgan shaxs guruh yetakchisi sifatida boshqa shaxslarni atrofiga jamlagan.

 

Ma’lum qilinishicha, guruh a’zolari Qirguli dahasi hududida maktab o‘quvchilari hamda fuqarolarni qo‘rqitish, tan jarohati yetkazish bilan tahdid qilish orqali telefon apparatlari va boshqa moddiy qiymatliklarni o‘g‘rilik, firibgarlik hamda talonchilik yo‘li bilan qo‘lga kiritib kelgan.

 

Shuningdek, mazkur jinoiy to‘da safiga boshqa yoshlarni jalb qilishga muntazam urinishlar bo‘lgani ham qayd etilgan.

 

Davlat xavfsizlik xizmati hamda ichki ishlar organlari xodimlari hamkorligida o'tkazilgan tezkor tadbirlar davomida guruhning noqonuniy faoliyatiga chek qo‘yilgan.

Hozirda jinoiy guruhning barcha a’zolari Jinoyat-protsessual kodeksining 224-moddasi tartibida vaqtincha saqlash hibsxonasiga joylashtirilgan.

 

Tezkor tadbirlar davomida gumonlanuvchilardan uyali aloqa vositalari, “gashish” giyohvandlik moddasi hamda sovuq qurol ashyoiy dalil sifatida olingan va tegishli hujjatlar rasmiylashtirilgan.

Ayni paytda holat yuzasidan tergovga qadar tekshiruv harakatlari olib borilmoqda.