O‘zbekiston va Ozarbayjon Prezidentlari uchrashuv o‘tkazdi

Boku shahriga amaliy tashrif doirasida O‘zbekiston Respublikasi Prezidenti Shavkat Mirziyoyev Ozarbayjon Respublikasi Prezidenti Ilhom Aliyev bilan uchrashuv o‘tkazdi. Bu haqda O‘zbekiston Prezidenti matbuot xizmati xabar berdi.

 

 

Ma’lum qilinishicha, suhbat avvalida O‘zbekiston Prezidenti Ozarbayjon yetakchisini Butunjahon urbanizatsiya forumining muvaffaqiyatli tashkil etilgani bilan samimiy tabrikladi.

 

Avvalgi oliy darajadagi muloqotlar chog‘ida erishilgan kelishuvlarni amalga oshirish doirasida O‘zbekiston – Ozarbayjon strategik sheriklik va ittifoqchilik munosabatlarini yanada rivojlantirish hamda mustahkamlashning dolzarb masalalari muhokama qilindi.

 

 

Tovar ayirboshlashning ijobiy sur’ati qayd etildi. Yil boshidan buyon o‘zaro savdo hajmi 40 foizdan ziyodga oshdi. Qurilish, tog‘-kon sanoati, energetika, qishloq xo‘jaligi, turizm va boshqa tarmoqlarda kooperatsiya loyihalari muvaffaqiyatli amalga oshirilmoqda.

 

Mazkur loyihalarni jadallashtirish hamda birgalikdagi investitsiyalarni, shu jumladan, Qo‘shma investitsiya kompaniyasi mablag‘larini jalb etgan holda yanada kengaytirish muhimligi ta’kidlandi.

 

 

Yetakchilar transportga oid tashabbuslarni amalga oshirish va xalqaro transport yo‘laklarini rivojlantirish bo‘yicha hamkorlikni kengaytirish masalalarini ham muhokama qildilar. Bo‘lajak oliy darajadagi tadbirlar rejasi ko‘rib chiqildi.