AQShdagi masjidda quroll hujum uyushtirildi: uch kishi halok bo‘ldi

 

AQShning San Diego shahridagi San Diego Islom markazi hududida sodir bo‘lgan qurolli hujum oqibatida uch kishi halok bo‘ldi. Mahalliy politsiya ma’lumotiga ko‘ra, hujumni amalga oshirgan ikki o‘smir keyinchalik o‘z joniga qasd qilgan. Bu haqda BBC xabar berdi.

 

Ma’lum qilinishicha, hodisa dushanba kuni ertalab yuz bergan. Dastlab politsiyaga o‘z joniga qasd qilishga moyil bo‘lishi mumkin bo‘lgan o‘smir haqida murojaat kelib tushgan. Oradan ko‘p o‘tmay, Islom markazida otishma sodir bo‘lgani haqida xabar berilgan.

 

Voqea joyiga yetib borgan huquq-tartibot xodimlari binoning old qismida o‘q jarohati olgan uch kishining jasadini aniqlagan. Keyinchalik hujumchilar masjiddan bir necha blok kvartal narida joylashgan avtomobilda o‘z joniga qasd qilgan holda topilgan.

 

Halok bo‘lganlar orasida markaz qo‘riqchisi ham borligi aytilmoqda. Skott Vahl uning harakatlarini “qahramonlik” deya baholab, aynan u yanada ko‘proq qurbonlar bo‘lishining oldini olganini ta’kidlagan.

 

Tergovchilar hodisa sabablari hozircha noma’lumligini bildirgan. Biroq gumondorlardan biriga tegishli yozuvlarda nafrat mazmunidagi fikrlar aniqlangani sababli hujum nafratga asoslangan jinoyat sifatida ham o‘rganilmoqda.

CBS telekanaliga bergan guvohlar intervyusida "yarim avtomatik qurol"ga o'xshash narsadan 30 tagacha o'q ovozi eshitilgani ma'lum qilingan.

 

Voqea vaqtida Islom markazi hududidagi maktabda bolalar dars jarayonida bo‘lgan. Hodisadan so‘ng o‘quvchilar xavfsiz hududga evakuatsiya qilingan, yaqin atrofdagi maktablarda esa vaqtinchalik karantin choralari joriy etilgan.

 

Kaliforniya gubernatori Gavin Nevsom hodisa yuzasidan munosabat bildirib, oilalar va bolalar yig‘iladigan, fuqarolar tinch va hamjihatlikda ibodat qiladigan markazda sodir etilgan hujum uni chuqur larzaga solganini ta’kidlagan. Uning so‘zlariga ko‘ra, shtat hukumati diniy jamoalarga qarshi qaratilgan terror va qo‘rqitish harakatlariga mutlaqo murosasiz munosabatda bo‘ladi.

 

Ayni paytda, Donald Tramp ham voqeaga izoh berib, otishmani “juda dahshatli holat” deb baholagan.

Oq uyda jurnalistlar savollariga javob bergan Tramp unga hodisa bo‘yicha dastlabki ma’lumotlar yetkazilganini bildirib, masala jiddiy tarzda ko‘rib chiqilishini qayd etgan.