Farg‘onada bir guruh ayollar norozilik bildirib, avtomobil yo‘lini to‘sib qo‘ydi
Ular bozordagi joylari olib qo‘yilganidan norozi savdogarlar bo‘lgan.
Farg‘ona viloyatining Qo‘shtepa tumanida bozor savdogarlarining joylari tortib olingani haqida ijtimoiy tarmoqlarda xabarlar tarqaldi. Mazkur holat viloyat IIB tomonidan o‘rganildi.
Ma’lum qilinishicha, Qumtepa mahallasidagi bozor hududida ayrim savdogarlar avtoturargohda savdo qilib, yo‘lovchi tashuvchi transportlar harakati va fuqarolar o‘tish yo‘laklarini to‘sib qo‘ygan.
Shu sababli tuman hokimligi va bozor ma’muriyati tomonidan ularga bozorning ichki qismida savdo qilish taklif qilinib, bir necha bor ogohlantirilgan.
Biroq savdogarlar belgilangan tartibga zid ravishda savdoni davom ettirgani aytilmoqda.
14-may kuni avtoturargoh hududida savdo qilish taqiqlanganidan so‘ng, bir necha ayol jamoat tartibini buzib, yo‘l harakatini to‘sishga uringan. Hodisa joyiga yetib kelgan ichki ishlar organlari xodimlari tomonidan vaziyat bartaraf etilgan va ishtirokchilar bilan profilaktik tushuntirish ishlari olib borilgan.
Qayd etilishicha, jamoat tartibini buzishga da’vat qilgan va huquqni muhofaza qiluvchi organ xodimlarining qonuniy talablariga bo‘ysunmagan 5 nafar fuqaro O‘zbekiston Respublikasi Ma’muriy javobgarlik to‘g‘risidagi kodeksning 195 va 201-moddalari asosida javobgarlikka tortilgan. Sud tomonidan ularga jarima jazosi tayinlangan.
